1 Omwâna mwenge asîma bamubwîrize, oshekasheka arhûmva amango bamâmukalihira.

2 Oku mukolo gw’akanwa kâge, omuntu analume oku hinjà, ci amagene g’endyâlya ntambala egabuka.

3 Olanga akanwa erhi mûka gwâge alanzire, oderha bwenêne kuhera anahera.

4 Omwôlo bw’alingira aha ali, ci birhacîlêrha byône, ba bushiru babiyigurha.

5 Entagengwa erhakwirirwa binwa bya bunywesi, camaganwa oku abêsherana kw’anahemulana.

6 Bushinganyanya bubika enjira y’obudahemuka, obwamaganwa kushûbula bushûbula nnabwo.

7 Hali ôbà arhajira cici, abulihimba amagale, hali n’ôbà ali nnabyo abulinaba mukenyi.

8 Ecicûngula omuntu, bibà birugu byâge; omukenyi yêhe arhayumva nka ye shimbirwe.

9 Akamole kabashinganyanya kabà kakolire, erhi n’itara ly’abâmaganwa lyâzima. 10 Akagayo, nnôngwe katula; aha bakengana ho oburhimanya bushundwa.

11 Obugale buyisha duba kuyonda bujà bwayônda; oburhondêra hitya, bwo bujà bwakula.

12 Okulangâlira ehi omuntu arhahikakwo, kulîsibwa n’amagala, murhi gwakalamo okubona ehi omuntu acîfinja.

13 Ogaya ihano erhi muhera, okenga irhegeko ye wanacira.

14 Ihano ly’omukulu nshôko ya kalamo, bulyo bwa kubona aha walufù arhegîre. 15 Obwîrhonzi bw’omuntu w’amakengu bunarhume arhona; enjira y’abarhebanyi ebà nzibu.

16 Omuntu wabona yêshi erhi ajà eruhya, erhi amarhangidôsa ihano; omuhwinja yêhe acîbirindike n’isirhe lyâge.

17 Ntumwa mbî erhuma omuntu ajâkwo obuhanya, entumwa nkana mugisho.

18 Buli buhanya zinali nshonyi okurhiba ihano, omuntu okuyêmêra ahanûlwa buli bwâmi.

19 Okuhikakwo ehi omuntu acîfinjaga, kunashagaluse omurhima. Abasirhe barhakwirirwa okuyâka amabî.

20 Okômera abagula naye anabè mugula, okômera abahwinja anashube wundi 21 Obuhanya bubà bukulikire lumino-mîno omunya-byâha, abashinganyanya bwôhe oluhembo lwâbo guli mugisho: munene.

22 Omugula, binjikulu, asigira akashambala kâge, ebi abahwinja basiga, mushinganyanya obiyîmamwo.

23 Ishwa lyomukenyi likahingwa linashalûle, haligi nâbafà erhi kubula bushinganyanya kurhuma.

24 Obîkiriza ehirhi hyâge, erhi omugala anashômba, omusîma bwenêne amukubûla.

25 Omushinganyanya alya anayigurhe, enda y’enkola-maligo erhahwa kulalikira ishali.