14
Oburhimanya lwago n’obuhwinja lwago
1 Burhimanya yêne ocîyûbakira, omusirhe yêne ocîshâbira.
2 Okulikira enjira nnungêdu akenga Nyakasane, n’oshomba enjira zâge amugayaguza.
3 Omu kanwa k’omusirhe mubà enzônza y’obucîbone, abarhimanya bôhe kanwa kâbo kababîka.
4 Aharhali mpanzi zahinga erhi na ntà ngano, âhali empanzi nzibu-nzibu ho n’omwâka guluga.
5 Câliho c’okunali arhabêsha, câliho w’obwîhambi kubêsha abêsha.
6 Omugambanyi anacihambe mpu ashìmba oburhimanya, okuyigîrira kw’omurhimanya kurhabâ kuzibu.
7 Okaziyâka omusirhe, wakanahaba iderha ly’abalenga.
8 Oku muntu mwenge, okucîlanga-langa buli burhimanya, ci isirhe ly’abahwinja kunali kurhebana kwône.
Hali enjira y’abenge n’ey’abahunyi
9 Endyâlya kushekera Nyamuzinda azishekera, entagengwa zôhe kurhonya azirhonya.
10 Omurhima guyishi burhè bwâgo, n’orhali nnagwo arhashangîra busîme bwâgwo.
11 Enyumpa y’endyâlya kuhya yânahye, oku ecihando c’entagengwa cayôloloka.
12 Hali enjira eboneka nnungêdu, ebulizinda erhi yahêka ekuzimu.
13 Amasheka ganayishemwo oburhè, n’obusîme buzinde erhi eri mirenge.
14 Omurhima mugalu-galu gunayumve gusîmire enjira zâgwo, n’omuntu nkana anayumve asîmire omukolo gwâge.
15 Idâga lyo liyêmêra ngasi oku banalibwîzire, omwenge yêhe anakazilola bwinjà ah’âgera.
16 Omurhimanya arhahimwa kurhînya n’okuyâka obubî, omuhwinja yêhe aburhûngane mpu ali ntwâli.
17 Ôbà burhè duba anakole ebigalu-galu, omurhimanya yêhe binji alêmbera.
18 Isirhe gwo mwanya gw’idâga, abalenga bôhe, obulenga co cimanè câbo.
19 Enkola-maligo zâcihwere oku idaho, ziharamye entagengwa, n’abaminya basengerere aha lumvi lw’omushinganyanya.
Omukenyi n’omugale
20 Omukenyi ciru n’omulungu anamushombe, omugale yêhe abîra bâge babà banji.
21 Okushomba omukenyi bulenzi, muny’iragi obêra abakenyi bwonjo.
22 K’okukola amaligo kurhali kuhaba? Lukogo na burhonyi oku muntu omalîra ebinja obushiru.
23 Ngasi mukolo gujira obunguke, ow’akalimi cizômbo ayunguka.
24 Ecimanè c’abarhimanya: obulenga bwâbo, ishungwè ly’abahwinja: isirhe lyâbo.
25 Câliho orhabêsha anagalukire omûka gw’omuntu, ci enderha-kubirhi, bunywesi enaderha.
26 Okurhînya Nyakasane kwanayêgemerwa, kunabè lwâkiro lw’abâna bâge.
27 Okurhînya Nyakasane: nshôko ya buzîne nshôko ya kufumya omuntu emirenge y’olufù.
28 Irenge lya mwâmi kubà na ngabo nyinji; muhona oku muluzi abantu bakamunyihira.
Omurhimanya ye na mwîrhonzi
29 Omuntu orhûza, bwîrhonzi acirhegekamwo, ci omukali erhi musirhe.
30 Amagala gw’omuntu erhi omurhima gudêkerîre, ci obwâgalwa cibolwe omu rhuvuha.
31 Okulibuza omuganda kubà kugayisa Owamulemaga; ci okubonera omukenyi obwonjo, kukuza Omulemi wâge.
32 Omumînya bumînya bwâge bunamulembika, omushinganyanya yêhe omu budahemuka mwo ashànga olwâkiro.
33 Omu murhima gw’obwîrhonzi mwo oburhimanya bubêra, ci burhimbwa omu murhima gw’abahunyi.
34 Bushinganyanya burhuma ishanja lyayôloloka, okukola amaligo kwo kubonêsa amashânja nshonyi.
35 Omushizi mwîrhonzi ye rhona ebwâmi, n’okulangâlira kwâge kunamucinge arhagitumula.