Yâgirwa lwîsa bano badwîrhe bandwîsa, rhabâlira bano banshimbire.

2 Yanka empenzi yâwe n’omushâbiro gwâwe, okanye ontabâle.

3 Ohume itumu abanshimbulwire bageremwo omusisi, obwîre omûka gwâni, erhi: «Nie kucira kwâwe».

4 Balya bashimbire omûka gwâni barhang’itumbaguza, enshonyi zibabumbe; Balyâla barhammirira marhî barhang’ishukira, enshonyi zibagwarhe.

5 Hano malahika wa Nyakasane akola abadwîrhe luminomino, bashube nka byâsi empûsi yayisha yayêhûla.

6 Hano malahika wa Nyakasane akola abadwîrhe luminomino, enjira yâbo ejemw’omwizimya n’obunterezi.

7 Bulyâla emirhego bantezire eri ya bumâma, n’omûka gwâni babîre baguhumbira enshinda oku bumâma.

8 Bamorhogerwa n’olufù barhanalîliri wâni! Mâshi bagwe omu murhego bàrhegaga bône banagwe omu mwîna bampumbîre mâshi!

9 Omurhima gwâni gwohe gwakaz’icishinga muli Nyakasane, gwakaz’icîtakîrira oburhabâle bwâge.

10 N’ebivuha byâni byoshi bikaz’iderha, mpu: «Yâgirwa ndi wakakuja omw’irhwe, we shugula engonyi omu nfune za ciri-misî, we shugula omunyi n’omukenyi omu nfune z’owal’imunyaga!»

11 Nabona bàyinamuka abahamirizi badârhi, bakaz’indôkereza ntanamanyiri.

12 Okunabajirira aminjà bôhe bangalulira amabî; gwo mutula gukângwarhaga.

13 Erhi bàbâga balwâla niehe nanyambale sunzu, ncîshalisagye nk’aha bwacêra obwo, nsâlirage emurhima obwo ntaluse.

14 Nkaz’igenda ndi burhè aka oli omu mishîbo y’omwîra wâge erhi ya mwene wâbo; nnangende nyûnamirîze aka oli omu mishîbo y’omuzîre wamuburhaga.

15 Bôhe erhi nabâga nka nadunga, banasîme, balâlikanage obwo, banjire omu ihano, banyâbuke banshûrhe. Bambambagule burhahusa,

16 bakaz’ingeramwo bananshekera, n’okujegeza amîno nie ntumire.

17 Yâgirwa mâshi, mbwîra nâni kasanzi kanganaci wacîshinga oli ebulâbi? Kanya olîkûze omûka gwâni kuli ezi ngoromora, ogushugule omu nyûnu z’ezi mpangaza.

18 Hano nkola nakuvuga omunkwa omu ndêko y’abantu najà, omu karhî k’olubaga najà hano nkola nakukuza.

19 Orhazigaga endyâlya zinshomba zamwemwerhwa, orhazigaga balya banshombera obumâma bakemana n’amasù.

20 Kàli ciru barhaderha binwa biyêrekîre omurhûla, bakabona omuntu ocîrhûlûlîre hano igulu banamusingire amenge.

21 Banakaz’incuma n’akanwa banaderha, mpu: «Hâco rhwacîbwînîre n’amasù gîrhu rhwêne!»

22 Obwînage obwo Waliha, omanye wankacihulika, omanyâge wankacinja kuli. 23 Tulûka orhahunge, otulûke ondwîre, Yâgirwa Nnâmahanga, Yâgirwa Muciza wâni, tulûkira luno lubanja lwâni.

24 Oluntwîre Yâgirwa, kulya onayôrha oshinganyanya, Nnâmahanga wâni mâshi orhazigaga bankwâma!

25 Orhazigaga bacîshingira emurhima baderha, mpu: «Ho rhwacilakiraga aho!» orhazigaga bacîshinga, mpu: «Rhwamukabize!»

26 Balya bacîshinga bakayumva mpanyagîre, batumbaguze mâshi, enshonyi zibabumbe, balya boshi bannimbira bacinyîgererakwo, babumbwe n’ezamêmè.

27 Balya bandwîrakwo bôhe bacîshinge banashagaluke, bayôrhe baderha, mpu: «Nyakasane aganze orhabâla omwambali mpu naye acîre».

28 Nalwo olulimi lwâni lukolaga lwakaz’imanyîsa obushinganyanya bwâwe, luyimbe n’irenge lyâwe bwaca-bwayira.