59
Ondîkûze oku bashombanyi bakali
1 Gwârhi omukulu w’abimbiza. Luyimbwa aka «Shukira orhashâbe». Lwa Daudi. N’izù linyinyi. Amango Saulu arhumaga abantu mpu baj’ilanga enyumpa ya Daudi, mpu bamunige.
2 Nkûla muno nfune z’abashombanyi bâni, ncinga kuli aba banshimbire, mâshi Nnâmahanga.
3 Ondîkûze kw’ezi nkola-maligo onandîkûze kw’ezi nkunda-mukò.
4 Niono barhezire busimba, niono nshimbirwe n’abadârhi.
5 Ndi ntyo Yâgirwa, ntà câha, na ntà kubî kundimwo ntadesiri nti najira kulebe kurhumire banshimbire ntya.
6 Tulûka okanye ocîbonere, Muciza w’emirhwe, Nyamuzinda w’Israheli, otulûke ohane ezo nkulira-lubala, ezo ncuku lêro orhazibêraga bwonjo.
7 Erhi byayîsh’ibà bijingo, banayisha bâmoka nka bibwa, bajè bahulahula omu lugo.
8 Kandi bâbo barhengamwo, bijâci byône bibali ekanwa, mpu: «Ndi wayumva?»
9 Wêhe Nyakasane kusheka odwîrhe washeka, kushekera oyôrha oshekera enkulira-lubala.
10 We buzibu bwâni, we nalolakwo, bulya Nnâmahanga, wêne we lwâkiro lwâni.
11 We Nyamuzinda wâni we na lukogo ncîkubagira, Nnâmahanga oyîshe ontabâle, okolere abashombanyi bâni buligo, nsîme.
12 Obanigûze mâshi Nnâmahanga, bankanashubîrira babè bo bakoler’olubaga lwâwe buligo, obashandâze n’emisî yâwe obahire okw’idaho, Nyamwagirwa we mpenzi yîrhu.
13 Ecâha câbo, binali bîra binwa bibarhenga ekanwa, bahanirwe ivuzi lyâbo n’okulogorha kwâbo.
14 Otulumukirwe bahere, baherêrekere barhacihabâga abantu boshi bamanye oku Nyamuzinda ye rhegeka omu ca Yakôbo, n’omu igulu lyoshi aha litanga n’aha liramuka.
15 Erhi byayîsh’ibà bijingo banajè bamoka nka bibwa, bajè bahulahula omu lugo.
16 Bajè bahulahula balonza ehi bâlya, bakabà barhayigusiri bajâge omu mulenge obwo!
17 Niehe kuyimba nayimba obuzibu bwâwe, buca sêzi ncîtakîre olukogo lwâwe, bulya washubire lwâkiro lwâni, washuba lubungo mbungiramwo olusiku ndi mutula.
18 We buzibu bwâni we nânalolakwo, bulya Nnâmahanga, we lwâkiro lwâni, we na Muciza wâni.