2 Amango Daudi arhêra Aramu Naharayimu bona Aramu w’e Soba, n’erhi Yowabu àrhabâluka amâyûs’ihimira Edomu omu kabanda ka Nyamunyu, bantu bihumbi ikumi na bibirhi

3 Nyamuzinda kulikirira oku warhulikirîre wanarhuvunira amatumu, kuluba oku warhulubîre, orhugalukirage mâshi mâshi.

4 Igulu walishakanyize lyahahanyuka, ofumagye obubere bwalyo bulya kudunga lidwîrhe lyadunga.

5 Olubaga lwâwe walukolîre ebizibu mushâna idivayi lya kudungadunga walunywesize.

6 Abakurhînya kukema wabakemire, mpu bayâke omwampi.

7 Orhurhabâlage wêne n’okuboko kwâwe, lyo abarhonyi bâwe balobôka, onarhuyumve.

8 Nyamuzinda erhi ali omu ngombe yâge, erhi: «Nkola nayimuka nj’igaba Siyoni, n’olubanda lwa Sukoti ndugabire bandi».

9 Erhi: «Ishwa lya Galadi libà lyâni n’erya Menashè kwo na kwo, Efrayimu yêhe yo mpenzi y’irhwe lyâni na Yûda bwo bwâmi bwâni.

10 Mowabu lwo lwôgero ncîkalabiramwo, Edomu yêhe namugera oku lwêru lw’enda, na Filistiya nâmuhima kano kânya.»

11 Lêro ndi wakampisa omu lugo luzibu? Ndi wakampisa cingana e Edomu wâni.

12 Nnâmahanga, kàli we warhucinagizagya wâni? Kàli orhadwîrhi wahuluka okarhabâla mwe n’abalwî bîrhu!

13 Mâshi mâshi orhurhabâle kw’oyu mubisha, bulyâla okurhabâlwa n’abantu kuli kwa busha.

14 Rhwakola emyônè oku burhabâle bwa Nnâmahanga yêne ye wajonjaga abashombanyi bîrhu.