2 Nyamwagirwa, nêci kukwânîne bakuyimbire omu Siyoni, banayûkirize omulagi bàkulaganyagya.

3 Bulyâla abakusengera, kuyumvîrhiza obayumvirhiza. N’emund’oli yo ngasi muntu ayêrekîre, erhi byâha byâge birhuma.

4 Ebyâha bîrhu byàrhuhizire okw’idaho, câba wâbirhenza.

5 Omuntu ocîshoga okanamuhêka, erhi muny’iragi, omu côgo câwe aj’ibêra. Rhwalya rhuyigurhe ebinja by’omu mwâwe, rhuyigurhe obwimâna bw’engombe yâwe.

6 Warhuyumvirhîze omu bushinganyanya bwâwe, wanarhuyêrekakwo n’ebimanyîso bisômerîne, Nyamuzinda, Mufungizi wîrhu, Mwîkubagirwa w’enyanja z’ekulî, n’ow’amahanga goshi.

7 We gwîka entondo n’okuboko kwâwe, we komekera n’obuhashe bwoshi.

8 We Cirhûza-nyanja, Cirhûza-mulaba, Cirhûza-kadugundu-ka-bantu.

9 Ab’emahanga omu bihamba bali, erhi bisômerîne byâwe birhuma; ab’ebushoshôkero n’ab’ebuzikiro bw’izûba, boshi omu mwishingo bali.

10 Igulu walirhandwîre, walidômera lyagala; olwîshi lwa Nyamuzinda luyunjwîre, wabayêgîze emyâka yâbo.

11 Wadômera endike wakoma amalongo, walibombêza n’enkuba wanagisha emyâka yamuli.

12 Omwâka waguhîre aminjà gâwe: aha wagera erhi na mugisho.

13 Amalambo g’omu irungu kuhulula gahulula migezi, n’entondo omwîshingo gwazizonzire.

14 Amalambo gayunjwîre masô, emmanda zirhâbonè bwikizo n’engano! ecihôgero n’enyimbo, mpu: «Rhw’oyo, murhuyumve!»