Mukuze Nyamuzinda mwe bihugo mweshi.

2 Muyimbe irenge lyâge, mumukuze oku bâyige.

3 Mubwîre Nnâmahanga, mpu: «Emikolo yâwe eri ya kurhangâza!» mpu: «Okuluga kw’obuhashe bwâwe, kunarhume abashombanyi bâwe bayish’ikushiga.»

4 lgulu lyoshi likugashânize linakuyimbire, izîno lyâwe liyimbwe omw’igulu lyoshi.

5 Mukanye mubone ebi Nyamuzinda àkozire, biri bya kurhangâza ebi àjizire omu karhî k’àbàbusirwe!

6 Enyanja ayihindula yashub’idaho lyûmu, bayikir’olwîshi n’amagulu burhajoma: rhucîtakîre ye là.

7 Buhashe bwâge arhegekamwo ensiku n’amango; isù lyâge lirharhenga oku bantu b’ihanga: mpu abagoma bankanatulumukirwa.

8 Mukuze Nyamuzinda wîrhu mwe mub’ihanga,

9 Ye warhuhiraga obuzîne omu mûka, arhanazigaga okugulu kwîrhu kwahabuka. 10 Nêci Nnâmahanga kurhangula warhurhangulaga, cîko warhurhanguliremwo nka kula barhangula amarhale.

11 Warhukulukuliza omu murhego, wanarhushwêkera omuzigo muzirho omu cibunu. 12 Waleka barhugera oku marhwe, rhwagera omu muliro rhwagera n’omu mîshi, ci wêhe washub’irhuhà obuluhûkiro.

13 Nkolaga nahika omu mwâwe n’enterekêro, ntang’ikurhûla emihigo yâni.

14 Eryâla akanwa kâni kànalîkaga, eryâla kàkulaganyagya amango nali mpanyagîre.

15 Nterekêro za bibuzi bitwedu nakurhûla, haguma n’omusingu gwa luganda-buzè: mpanzi nakubàgira haguma n’empene z’ebihebe.

16 Mwe mukenga Nyamuzinda mweshi mukanye muyumve, mukanye mmurhondêreze ebi àjirîre iroho lyâni!

17 naj’aho namuyâkûza n’aka kanwa kâni, namusengera n’olululimi lundi ekanwa.

18 Omurhima gwâni nka gwàli gwa ndyâlya, Nyakasane arhàkanyumvîrhîze.

19 Ci kwo biri: Nyakasane anyumvîrhize: izù ly’omusengero gwâni alirhega okurhiwiri.

20 Nyamuzinda ayâgirwe mâshi, erhi mbona arhakengwîri omusengero gwâni, erhi mbona arhahengulîri olukogo lwage kulî kulî nâni.