Nyamuzinda mushâna abâ mwinjà kuli Bene-Israheli, abâ mwinjà oku bantu b’omurhima nkana.

2 Amagulu gâni okwisi gagend’ebinzongonzongo, hindi hitya amagulu gâni garhereze.

3 Kulya kubà nàyâgîrwe, erhi mbona okubêrwa enkola-maligo zibêrwa.

4 Bôhe barhajira maganya maci, barhalaka ndwâla barhalaka na buhorho buci.

5 Ezi mmanja zibà oku bantu bôhe zirhababakwo, bôhe barhahanirwa haguma n’abandi bantu.

6 Ko kala kagayano bayambala omw’igosi, ko kala kadali bayambaliza nka cirondo.

7 Obubî bwâbo kupamuka bupamuka omu murhima guzinzire, enkengêro zâbo kucîlasha zicîlasha.

8 Iderha lyâbo n’amasheka gâbo, bulyâlya bwône, n’okulimbira emisî kwâbo, kagayano kakulêrha.

9 Akanwa kâbo, oku kàlwîsa amalunga, olulimi lwâbo lwazinga-zinga igulu.

10 Okwo kwarhuma olubaga lwâni lwayêrekera emunda bali, n’amîshi bàganywa bàrhama, mpu:

11 «Kurhi Nyamuzinda ankamanya?» mpu: «K’Ow’Enyanya ankamanya?»

12 Kwo bayôrha ntyo abanya-byâha, okudêkerera bo bene-kwo n’okubêrwa n’ebirugu, bo bene-kwo.

13 Kumanya busha narhamiraga erhi nnanga omurhima gwâni nti gurhazingaga, erhi nkalabira enfune omu bwêru-kwêru?

14 Bulyâla mpimbo ndwîrhe nalya ngasi mango, na ngasi lusiku erhi na buhane nahâbwa.

15 Ncigerêrezagye nti: «Ka nderhe akâbo», nali nacîkûla omu karhî ka bagala bâwe.

16 Nacîja emurhima obwo, nti: «Ka nyumve okwo»; nabona oku kuli kurhama bwenêne.

17 Nalinda mpika oku mahwe ga Nyamuzinda, lyo nkabonaga okuhera kw’abanya-byâha.

18 Ewa, oku ntuli kuno obayâbulira, obul’inabahirikira omu buhanya!

19 Kuziga barhimang’irhibuka wâni! Kuhirigirha bahirigirha bahêkwe n’ebihamba.

20 Nyamwagirwa, kwo obalola kula omuntu alola ecilôrho erhi azûka, erhi ôbà wamâtulûka orhashîbirira mpu olole kurhi bâli bashushire.

21 Amango omungo gwàli gungwêrhe, nayumva nka kuno bamandira emurhima.

22 Kuhwinjagala nali mpwinjagîre, ntàli mmanyire bici, omu masù gâwe kwo nali nyôsire nka nkâfu.

23 Niehe nâyôrha mbà haguma nâwe, wanyansire wangwârhira oku kuboko.

24 Wêne walonzize okumpabûla, wêne wâyishir’inyakirira omw’irenge.

25 Wundi ndi njira omu mpingu aha nyuma zâwe? N’amango rhuli rhwembi, igulu ntà bununu mbwîne lirikwo.

26 Amagala ciru gankarhemuka, n’omurhima ciru gukarhemuka, Wêne we Kabuye k’omurhima gwâni, We wanayôrha ôbà mwanya gwâni ensiku n’amango.

27 Bulyâla abakutwîka kuhera baj’ihera, abakuleka baj’ishiga bandi balume kuzigulula onabazigulula.

28 Niehe okubêraho Nyamuzinda kwo kwinjà kwâni, n’okujira Nyakasane Nyamuzinda lwâkiro lwâni. Emikolo yâwe yoshi, nâyiyimba aha lumvi lwa mwâli-Siyoni