Mâshi Nnâmahanga, ci warhulekêrîre mâshi? Carhumire walubira ebibuzi by’omu busô bwâwe?

2 Kengêra lulya lubaga wacîshogaga kurhenga mîra, gulya mulala wacungulaga mpu gubè gwâwe, kengêra na kulya wacîshogaga entondo ya Siyoni onagwîkakwo entebe yâwe.

3 Orhang’ibà nka wahira okugulu mwo bîra bikola byayôrha bibà bigûkà, ngasi kantu kali omu ngombe omushombanyi akashandâzize koshi.

4 Ababisha bàjîre aha ngombe yâwe babandiraho akakû, bagwîka amatumu gâbo bacîtakîra.

5 Kwo bâli ak’abâkonda omuzirhu n’embasha.

6 Enyumvi z’olurhambâ lwâwe, bàziyûsize bazivunanga n’embasha n’enyundo.

7 Oluhêro lwâwe bàludûlisire muliro, n’ecirâlo c’izîno lyâwe hanw’igulu bacîhemwîre. 8 Kwo bàdesire emurhima, mpu: «Rhushâbire byoshi kuguma», mpu: «Ngasi mahêro Nyamuzinda ajira hanw’igulu goshi mugayôce.»

9 Ebisômerîne bîrhu arhali rhwe rhwâcibilolekwo, na ntà mulêbi ocihali, rhurhanalimwo omuntu omanyire mangaci ebi byâhwa.

10 Nnâmahanga, mangaci oyo mubisha âleka okurhukwâma, kàli anakolaga ashekera izîno lyâwe burhahusa obwo?

11 Cici cirhumire washukira cici cirhumire wabeza okulyo kwâwe oku cifuba? 12 Nyamuzinda ye Mwâmi nshiga kurhenga mîra, ye Mufungizi onfungira mw’er’igulu.

13 W’olya waberag’enyanja n’obuhashe bwâwe, washangula amarhwe g’enjoka omu mîshi.

14 W’olya watuntumaga amarhwe ga Leviyatani, wamuhà eby’omu nyanja byamushêga.

15 W’olya wamezagya enshôko wazûsa n’emigezi, enyîshi nênênè waziganya.

16 We Nn’omûshi we na Nn’obudufu, We wamanikaga omwêzi n’izûba.

17 We watwîraga idaho aha lyagalukira, ecanda n’empondo we wabijiraga.

18 Okengêre n’oku: oyo mubisha kushonza okwo akushonzize, Nyakasane, n’eryôla ishanja ly’abasirhe lyajacîre izîno lyâwe lyarhama.

19 Engûkù yâwe omanyâge wankayihâ lubakâ, n’omûka gwa bambali bâwe orhaguyibagiraga bujayo!

20 Lolakwo erya ndagâno yâwe: mwo cirya cihugo, enyâkiro n’amashwa, ntaho barhâlwa.

21 Omunyi arhakurhengagaho n’enshonyi, omukenyi n’omunyi bacîtakîre izîno lyâwe.

22 Nnâmahanga, yimuka wêne olwîse olwo lubanja, okengêre n’ebijâci abo basirhe bàdesire balegerera bakujacira.

23 Orhahushaga izù ly’abashombanyi bâwe, akavù katuzirwe n’abakurhêzire kacidwîrhe kazûka.