2 Nnâmahanga nayâkûza obu nakûbiriza ntya, ye ndwîrhe nayâkûza nti anyumve nâni.

3 Olusiku ngwêrhwe n’omutula Nyakasane ye nnongereza mbone, okuboko kwâni kunalâle kwamuyimbira obudufu bwoshi.

4 Erhi nayîsh’ikengêra Nnâmahanga, nnanyumve ecifufu, erhi nayîsh’irhanya, nyumve omurhima gurhaciri gwâni gurhoge.

5 Engohe zâni wazibuzize buhunga, omurhima gwâni gwabuzire budêkerera, lêrha ciru okuderha akanwa ntakuhashiri.

6 Ndwîrhage nagerêreza ensiku zàgezire, nkengêre emyâka yali burhanzi, ntanye-ntanye!

7 Erhi bwayîsh’ibà budufu nangerêrezagye emurhima, nkengêre ndôse emirhima.

8 Nti: «Nyamuzinda kàli warhulekêrîrage obwo? Orhakanacirhubabalira bundi?

9 Kàli rhwanatûhirage lwoshi omu masù gâge, n’omulagi àrhulaganyagya ntà mwâna wîrhu wâciguhikekwo.

10 Ka Nyamuzinda kuyibagira ayibagire olukogo lwâge, nîsi erhi burhè bwarhuma anywa embuli aleka olukogo lwâge?»

11 Naderha obwo, nti: «Gwo mutula gungwêrhe ogwo, gunali gw’ogu, kulya kubà okuboko kw’Ow’Enyanya bwenêne kwahindusire kundi kundi.»

12 Kukengêra nkengêra emikolo ya Nyakasane, nêci nankengêre ebisômerîne byâwe bya mîra.

13 Nkolaga nagerêreza nkengêre emikolo wakozire, ngere n’omu bijiro warhujirîre.

14 Nnâmahanga, enjira yâwe erhagerwamwo, ka hali wundi Nyamuzinda oli aka Nyamuzinda wâni?

15 Mushâna we Nyamuzinda, we jira ebirhangâzo, wayêresire amashanja gabona obuhashe ojira.

16 wayanka walîkûza olubaga lwâwe n’okuboko kwâwe kulyo, walîkûza bene-Yakôbo na bene-Yozefu.

17 Amîshi gàkubona, Nnâmahanga, gàkubona gàgeramw’omusisi: 18 Ebitù byàdubula amîshi, ecitù càkungula n’emyampi yâwe yàbalala.

19 Enkuba yâwe yalaza, orhukengulo rhwamoleka igulu, igulu lyàrhemuka, lyàgeramw’omusisi.

20 Wàyanka watwa enjira omu nyanja, wakoma enjira omu nyanja y’amîshi, lêrhaga ciru amashando gâwe.

21 Wàjà watunda olubaga lwâwe nka busô, walutunda n’okuboko kwa Mûsa na Aroni.