Lubaga lwâni yumva nkubwîre, rhegi okurhwiri muyumve oku nâderha.

2 Nkola nabumbûla akanwa, nkola nâtwa emigani, nkola nâbasa agàli mahwe kurhenga mîra.

3 Birya rhwayumvagya rhwanabimanya, birya rhwabwîragwa na balarha,

4 Rhurhankabifulika abinjikulu bâbo, rhurhankabula bwabimanyîsa abâna bâburhwa. Rhwababwîra oku Nyakasane alumeha kwoshi, obuhashe bwâge n’ebinja àjizire by’okurhangâza.

5 Ayansire aderha akanwa omu ca Yakôbo, agwîka irhegeko omu ca Israheli. Akomêreza ababusi bîrhu mpu irhegeko bahîrwe balimanyîse abâna bâbo.

6 Iburha lyâyisha, bo bâna baburhwa abo, mpu nabo bamanye banamanyîse abâna bâbo.

7 Nabo bakaz’icîkubagira Nyamuzinda, barhag’iyibagira emikolo ya Nnâmahanga, ci bakaz’ishimb’amarhegeko gâge.

8 Barhanabâga ishanja lya bagoma, ba cabira-bahana, aka bashakulûza wâbo. Lyo lyàli iburha lya murhima guli nka gwa ngoko, omurhima gwâbo gurhàli gusêzire kuli Nnâmahanga.

9 Aka bene-Efremi bàbâga bafôzire banahinika, babul’iyâka erhi olusiku lw’okulwa luhika.

10 Ecihango ca Nyamuzinda bàrhacifumaga, bulya bamâlahira bwa kulikira irhegeko lyâge.

11 Bayibagira ebinja àli àbajirire, n’ebijiro by’okurhangâza àli àbayeresire.

12 Ali àjirîre ebisômerîne by’enkwîra omu masù ga b’îshe, amango bâli omu cihugo c’e Mîsiri n’oku irango lya Sowani.

13 Enyanja ayiberamwo kabirhi abayîkiza, anayîmanika amîshi nka côgo ca kuhalira. 14 Akaz’ibalusa n’ecitù mûshi, akaz’ibamolekera n’omuliro budufu.

15 Abêra amabuye omu mpinga àbanywesa bàguka aka owanywer’aha nshalalo,

16 Apamula amîshi omw’ibuye, akûlamwo amîshi gahulula nka nyîshi nênênè.

17 Kurhahangaga barhashub’igwîra babîhira Ow’Enyanya, n’okumugayikiza omu mpinga.

18 Omu mirhima yâbo balonza okurhangula Nnâmahanga, bahûnira ebiryo obuhubu.

19 Bashinyagulira Nnâmahanga, mpu: «Ka Nyamuzinda akarhubonera eci rhwalya omu mpinga?»

20 Mpu: «Dala oku abîre nk’akoma okw’ibuye amîshi gafukûkamwo, ashûrh’okw’ibuye enyîshi zapamukamwo. Mpu: Omugati gwo? K’akarhuboneragwo, nîsi erhi aderhe mpu alîsa olubaga lwâge oku hy’amîru?»

21 Lêro erhi Nyakasane àyumva ntyo oburhè bwamugwârha, embasha yajà ecîko erhi Yakôbo orhuma, àlubira Yakôbo nk’aha bwacêraga.

22 Bulyâla barhayêmêraga akanwa ka Nnâmahanga, barhacikubagiraga oburhabâle bwâge.

23 Kurhanahangaga arhanarhegeka ebitù by’enyanya, anahamûl’enyumvi z’emalunga.

24 Enkuba y’amâna g’okulya yacîbânda okw’idaho, mpu: «Nki omugati gw’emalunga». 25 Omuntu naye aluma oku biryo by’abazibu, biryo ebyôl’abantu bàrhumiragwa mpu balye basîme.

26 Ashub’ijà aho: atul’empûsi emalunga, n’oku buhashe bwâge azûsa kalemêra.

27 Enyama zàbâgwakwo nka katulo, n’ebinyunyi, birya by’amashala, byagwa nka mushenyi omu nyanja.

28 Byacîkananika omu birâlo byâbo, byakaz’igwa aha burhambi bwa ngasi cihando câbo.

29 Balya, bayigurha, babundêza, amîru gàli gabagwêrhe gatwîka.

30 Oku ebiryo bicibali ekanwa, oburhè bwâbo bwagwârha Nnâmahanga.

31 Anigûza abagula bàbalimwo, n’emisole y’Israheli ayihir’okw’idaho.

32 Kurhahangaga barhabîha okurhalusire, banabula buyêmêra ebisômerîne byâge.

33 Lêro ensiku zâbo àzisingônola kano kanya, n’emyâka yâbo ayigeza buhena.

34 Oku adwîrhe abanigûza bamulongereza, banakaz’igaluka bal’ilonza Nyamuzinda,

35 Banakaz’ikengêra oku Nyamuzinda ye Kabuye kâbo, oku Ow’Enyanya ye Muciza wâbo.

36 Babulikaz’imurheba obwo n’akanwa kâbo, babulikaz’imuhêkakwo akalimi kanywesi.

37 N’omurhima gwâbo gurhali gushingânîne mpu guyêrekere emund’ali, n’akanwa bàfundikiraga haguma naye barhakasêzagya.

38 Ci kwône yêhe akaz’ibafa lukogo omu kukaz’izâza obubî bwâbo n’omu kubula bwabaherêrhera; akaz’icika omutula gwâge àhâli h’okubarhulira kuli gwo.

39 Yêhe akaz’ikengêra oku zinali ngonyi, oku gunali mûka kwône, gwo gugenda burhagaluka.

40 Oku bakaz’imushongeza omw’irungu banamugayikiza omu mpinga wâni!

41 Bakaz’ishubirira barhangula Nnâmahanga n’okujira Omutagatîfu w’Israheli burhè.

42 Barhanaderhaga mpu bakengêre kulya kuboko kwâge, nîsi erhi lulya lusiku abashugulaga omu nfune z’omubisha.

43 Barhakengêraga oku akolaga eby’okurhangâza omu Mîsiri, n’ebisômerîne omu irango lya Sowani.

44 Oku àhindulaga enyîshi zâbo zashuba mukò gwône gwône, n’emibunda yâbo kwo na kwo mpu bankananywa.

45 Oku àbarhumiraga ebibugu mpu bibalume, n’ebikere mpu bibalibuze.

46 Oku àlikiraga amahanzi omu myâka yâbo, n’emburho yâbo ayirhega enzige.

47 Barhacitwaga ihuzihuzi ly’oku àlikiraga olubula omu mizâbîbu yâbo, n’ehiboho hy’obunya lwikungu omu mirhi yâbo.

48 Oku àhenguliraga olubula omu bihêsi byâbo, n’enkuba omu masô gâbo.

49 Oku abalikiragamwo idûrhu ly’oburhè bwâge, abalikiramwo n’omutula n’omungo n’amalibuko: erya ngabo y’abaganda bahisa obuhanya!

50 Oku àyiguliraga omutula gwâge àbula bubacinga oku lufù, analeka ebintu byâbo byajamwo ecihûsi.

51 Barhakengêraga oku àlambikaga ngasi nfula y’omu Mîsiri okw’idaho, alambikakwo na ngasi lubere lw’abàli omu bihando bya bene-Hamu.

52 Oku àyishaga atunda olubaga lwâge nka bibuzi, abageza omu mpinga nka busô bwa bibuzi.

53 Oku àbayikizagya bwinjà bwinjà buzira bwôba, n’enyanja yamirangusa abashombanyi bâbo.

54 Oku abahisagya omu cihugo câge citagatîfu abahisa aha ntondo àcihâga n’okuboko kwâge.

55 Amashanja g’eco cihugo agalibirhakwo banasinza agagaba myanya-myanya gashuba birugu bàyimamwo, n’ebihando by’ago mashanja emilala y’Israheli yabishobôla.

56 Ci bôhe bakaz’irhangula Nnâmahanga, bakaz’ishonza Ow’Enyanya bwenêne, banabula bushimba amarhegeko gâge.

57 Bahabuka banahemuka aka bashakulu wâbo, bagolonjoka nka ndyâlya ya muherho.

58 Bamujira burhè n’empêro zâbo z’oku ntondo, n’ebishanga byâbo byamuzûkiza obwonganwa.

59 Lêro Nnâmahanga ayumva omutula gwamugwârha, kwo kukaga Israheli.

60 Aleka ecirâlo c’omu Silo obwo, co cirâlo àli agwîsire omu karhî k’abantu.

61 Okubundi aleka emisî yâge bayihêka mpira, n’irenge lyâge alirikira omu nfune z’omubisha.

62 Olubaga lwâge nalwo alurhega engôrho, akunirira omwîmo gwâge.

63 Abâna bâbo b’emisole omuliro gwabashamula, abâna-nyere bâbo babula ciyansire.

64 Abadâhwa bâbo engôrho zabashenyula, n’abakana bâbo ciru barhalakaga.

65 Lêro Nyakasane anacitulîka nk’owarhenga îrò, atulumukirwa nka murhabâzi wali ogazirwe n’amamvu.

66 Abashombanyi bâge abagezamwo ecôji, ababonesa eza mêmè, zirya z’enkwîra.

67 Akengula ecirâlo ca Yozefu, anabula bwacîshoga obûko bwa Efrayimu.

68 Ci yêhe abà obûko bwa Yûda bwo acîshoga. Abà entondo ya Siyoni yo arhonya.

69 Engombe yâge ayiyûbaka ndîrî ak’amalunga, ayigwika ya nsiku n’amango ak’igulu.

70 Kwo kucîshoga omwambali Daudi obwo, amukûla ebulambo erhi ayâbwîre ebibuzi.

71 Amuhamagala erhi ayisha atunda ba-lubuzè, amuhamagala mpu ayâbule Yakôbo, lwo lubaga lwago, na Israheli, gwo mwîmo gwâge.

72 Akaz’ibayâbula n’omurhima mukombêdu, akaz’ibatunda n’enfune z’obwîrhonzi.