1 Yâgirwa Nyamuzinda we cîhôla, Yâgirwa Nnâmahanga we cîhôla kanya.

2 Oyimuke we twa emmanja z’igulu, abagayana obahè ebi banakwânîne.

3 Yâgirwa mangaci, Waliha mangaci ababî bâleka okulîmbirira kwâbo?

4 Mangaci bâleka okulogorha n’okuderhera akagayo? Mangaci ba nyankola-maligo bâleka okucîtakîra?

5 Yâgirwa kàli olubaga lwâwe baluhinazire, n’omwîmo gwâwe bagulibuzize.

6 Badwîrhe baderha, mpu: «Nyakasane arhabona», mpu: «Nyamuzinda wa Yakôbo arhadwîrhi atwa ciru ihuzihuzi».

7 Kàli badwîrhe baniga omukana, banige ecigolo banige n’ecirhaba.

8 Lêro mweki mwe bahwinja omu lubaga, rhangi muyumve; Lêro bino bingolongolo mangaci byarhimanya?

9 K’owashoshaga okurhwiri omu irhwe ye wabula bwayumva? Nîsi k’owagwîkaga isù ye kolaga wabula bubona?

10 K’ohanûla amashanja ye kolaga wabula buhana? K’erhi ye nayigîriza abantu obumanye obwo?

11 Kàli Nyakasane arhahabiri enkengêro z’abantu: 12 Yêhe ali muny’iragi Yâgirwa, omuntu oyemera wamubwiriza; oyemera wamuyigîriza irhegeko lyâwe.

13 Mpu lyo arhengamwo entemu y’ensiku mbî, oku enshinda ya nyankola-maligo yahumbwa.

14 Nanga, Nyamwagirwa arhâyôze olubaga lwâge, arhâjandâge ebyâge by’omwîmo. 15 Okutwa emmanja kwoki kwashubira omu njira y’obushinganyanya, n’emirhima eshingânîne yoshi mwo ekola yashubira.

16 Ndi wajagindwîkiza ba nyankola-maligo? Lêro ndi wakabanjira omw’irhwe?

17 Nyamwagirwa andwîrakwo, ci oku isî iroho lyâni lirhaja omu balinda-mboho.

18 Erhi naciderha, nti: «Okugulu kwâni kurhasêra», nyumve Yâgirwa bwenêne nsêzire omu burhonyi bwâwe.

19 Erhi naciyumva ebihamba binduga emurhima, nyumve oburhûlirize bwâwe bushagaluse omurhima omu nda.

20 Yâgirwa lushangi luci mweshi n’engombe y’endyâlya? Engombe ezûsa entambala mpu ly’irhegeko erhi irhegeko!

21 Bôhe mpu omûka gw’omushinganyanya bagushimbulule bagubone; n’omukò gw’orhajiraga kubî kuci bagulagirize.

22 Nyakasane arhâbule bwambêra lwâkiro, na Nnâmahanga ambêre ibuye nacîfulikaho.

23 Ababî bôhe abahengulira obubî bwâbo, n’obubî bwâbo bwo anabahezamwo, nêci, kuheza abaheza, Nyakasane Nyamuzinda wîrhu.