1 Muyishe rhuhindire Nyakasane, rhuyakuze ibuye lyàrhucizagya.

2 Rhujè omu masù gâge rhucîtakîriremwo, rhuyimbe rhunasâmiremwo.

3 Bulya nêci Nyamwagirwa ali Nyamuzinda mukulu, anali Mwâmi okulîre banyamuzinda boshi.

4 Enyenga z’en’igulu aha nfune yâge zibà, n’amasongêrwe g’entondo goshi gâge. 5 N’enyanja eri yâge: bulya yêne wayijiraga, n’idaho lyûmu nalyo lyâge: nfune zâge zàlibumbaga.

6 Muyishe rhuharâmye Nyakasane rhufukame embere zâge bulya ye warhulemaga. 7 Bulyâla ali Nnâmahanga wîrhu, nîrhu rhuli lubaga lw’irango lyâge, rhuli bibuzi bitundwa n’okuboko kwâge.

8 Murhakarhangiyumva izù lyâge ene: mukaliyumva murhazigaga emirhima yinyu yâgârha, nka kulya yàgârhaga e Meriba, nka kulya yàgârhaga e Masa omw’irungu olusiku lw’amashumi.

9 Lulya lusiku basho bangeramwo, bulyâla bantangulaga bànabwîne ebi nkola.

10 Myâka makumi anni yoshi erhi oburhè bw’eryôla iburha bungwêrhe, naderha obwo nti: «Omurhima gw’olu lubaga kuhabuka gunahabusire», nti: «Ciru barhishi enjira zâni oku zigenda.»

11 Nacigasha muli obwo burhè, nti: «Barhâlabarhe omu iluhûkiro lyâni.»