2 Yâgirwa oyumve guno musengero gwâni, onaleke izù lyâni likuhikekwo.

3 Omanye wakanfulika obusù bwâwe olusiku omutula gunwerhe. Ontege okurhwiri, hano nkuyâkûza oyirukire wayumva.

4 Yâgirwa ensiku zâni kwo zahirigisire nka mugî, n’orhuvuha rhwâni kwo rhudûrhubîre nka buhya bwa muliro.

5 Omurhima gundi omu nda bagudûrhwîre, kwo gwayûmirage nka hyasi, ebiryo ntaciyumvîrhi bindi oku murhima.

6 Nalasirage naganûkirwa, omubiri gwalinda gunyumira oku rhuvuha.

7 Kwo nkola nyôsire nka munyunyi w’omu mpinga, nka mutulama gw’ebigûkà.

8 Nacibêrire nie Karhahunga, nie Nyamulakà, kula akanyunyi kasigala kône-kône oku nyumpa.

9 Abashombanyi bâni badwîrhe balegerera banjâcira, nie basirahiragekwo n’izîno lyâni lyo badwîrhe bashârhamwo

10 Oluvù byo biryo ndwîrhe nashêga nnanyikule, na ngasi eci nanywa erhi cinali cigushemwo emirenge.

11 Burhè bwâwe n’omutula gwâwe byandwîrhîre okwo, bulyâla wannengezize wantimba okw’idaho.

12 Ensiku zâni kwo zishushire nka cihôho cirî-cirî, nâni niehe najìre nayûma nka hyasi.

13 Wêhe Nyakasane ho oyôrha ôbà, n’izîno lyâwe kuderhwa liderhwa omu maburhwa goshi.

14 Oyimuke obabalire Siyoni, bwacîre bw’okumubêra lukogo,

15 Bulyâla bambali bâwe barhahimwa kusîma amabuye gâge, barhakabula bwayumva omutula omu kubona Siyoni ashâbûka.

16 Wàbona oku amashanja gakuza izîno lyâwe obwo Nyakasane, n’abâmi b’igulu boshi bakenge irenge lyâwe.

17 Hano ôbà wamâshubiyûbaka Siyoni, Siyoni yeshi aboneka omu irenge lyâge,

18 Nyakasane oyêrekere omusengero gw’abakenyi, buzira kulekêrera omulenge gwâbo.

19 Ebîrà biyandikirwe abâna baciburhwa, n’olubaga lwayishilemwa lukuze izîno lya Nyakasane.

20 Bulya Nyakasane abîre ali omu ndâro yâge, abîre ali emalunga àlîkira amasù okw’idaho,

21 Mpu ayumve omulenge gw’abashwêke bujà, analîkûze abatwirirwe okufà.

22 Na ntyo izîno lya Nyakasane lije irenge omu Siyoni, n’irenge lyâge liderhwe omu Yeruzalemu,

23 Olusiku amâmi n’amashanja gàja haguma mpu gakolere Nyakasane.

24 Emisî yampwêrîre njira, n’ensiku zâni bazitwîremwo.

25 Yâgirwa Nnâmahanga omanye wampêka nnanciri omu karhî k’ensiku zâni. Emyâka yâwe wêhe ho eyôrha ebà omu maburhwa n’amâburhwa.

26 Emurhondêro wajà aho wabandaho igulu, amalunga nago mukolo gw’amaboko gâwe.

27 Byombi kuhêka byâheka, ci wêhe we Nyamubâho, byoshi kwo byâkoye nka bwikûnjè, kwo obihindula nka mwambalo binahinduke.

28 Wêhe orhahinduka, n’emyâka yâwe erhajira aha ehekîre.

29 Abâna ba bambali bâwe bâyûbaka n’omurhûla, n’abâna bâbo bayôrhe bali omu masù gâwe ensiku n’amango.