Murhima gwâni, kuza Nyamuzinda, n’ebindi oku ndubi y’omurhima bikuze izîno lyâge.

2 Murhima gwâni, kuza Nyamuzinda, ntà nshobôlo yâge oyibagirage.

3 Ye babalira ebyâha byâwe byoshi, Ye fumya obuzamba bwâwe bwoshi.

4 Ye yôkola obuzîne bwâwe omu nyenga, Ye kuyunjuza inêma n’obwonjo.

5 Obuzîne bwâwe ye buyunjuza minjà, obusole bwâwe ye bujira buhyâhya nka bwa nyunda.

6 Nyamuzinda ojira oburhondekezi, acîranulira abarhindubizîbwe.

7 Ye wabwîraga Mûsa amahwe gâge, n’abâna b’Israheli àbayêreka ebirhangâzo byâge.

8 Nyamuzinda ye ntahimwa lukogo na bwonjo, arhakunira duba, anali buzigire.

9 Arhakaliha kuhika okurhalusa, arhanarhulyûza kungana obubî bwîrhu,

10 Arharhujirira kungana ebyâha bîrhu, arhanarhulyûza kungana obubî bwîrhu.

11 Nka kulya amalunga gali enyanya ly’igulu kwo n’obuzigire bwâge bugwêrhe obuhashe oku bamurhînya.

12 Nka kulya ebushoshôkero eri kuli n’ebuzikiro, kwo Nnâmahanga ahirika kuli ebyâha bîrhu.

13 Nka kulya îshe w’abâna abà mwonjo oku bâna bâge, kwo na Nyamuzinda ali mwonjo oku bamurhînya.

14 Ayishi bwinjà eci rhwabumbagwamwo, arhahabiri oku rhuli luvù.

15 Omuntu ensiku zâge ziri nka hyasi, kwo amera nka bwâso bw’omu ishwa.

16 Empûsi ekamugerakwo erhi arhacihali, orhankacimanywa aha àbâga burhanzi.

17 Obuzigire bwa Nyamuzinda oku bamuyôboha bôhe buli bw’ensiku n’amango, n’oburhondekezi bwâge oku bâna b’abâna bâbo.

18 Oku babîkirira amalaganyo gâge, abakengêra amarhegeko gâge n’okujira ebi alonza.

19 Nnâmahanga àjêberize entebe yâge omu mpingu, omu bwâmi bwâge burhegeka byoshi.

20 Mukuze Nyakasane mwe bamalahika bâge mweshi, mwe ntwâli zâge, mwe mujir’akanwa kâge, mwe muyumva izù lyâge mumukuze.

21 Mukuze Nyakasane, mwe ngabo zâge mweshi, mwe bambali bâge, mwe mujira ngasi oku alonza, mumukuze.

22 Mukuze Nyakasane, mwe biremwa byâge mweshi, omu bwâmi bwâge mweshi mumukuze. Murhima gwâni kuza Nyakasane!