1 Murhima gwâni kuza Nyakasane! Yâgirwa Nyamuzinda, mushâna oli mukulu kulusha!

2 Ocîbwîsire obukulu n’obwinjà, ocîhundikîre obulangashane nka cirondo.

3 Amalunga we wagakanûlaga nka lukangà, wayûbakira empamikwa zâwe oku nyanya z’amîshi. Ebitù wabijira ngâlè yâwe, byûbi bya bitù oyishakwo.

4 Empûsi wazijira ntumwa zâwe n’engulumira bashuba baganda bâwe.

5 Wayanka igulu walidêkereza oku bikondo byâlyo: lirhankafà lyâhuliganyire.

6 Waliyambika enyanja kulya bayambika omuntu omushangi, amîshi gamanana oku nyanya z’entondo.

7 Wabà nka wakankama gakûla idârhi, wakungula gageramw’omusisi.

8 Galya entondo n’amîno, gabungulukira omu rhubanda, gajidêka aha wagatwîrîre gâhekera.

9 Olubibi wagatwîrîre, garhakalutwa mpu gashubizisa igulu.

10 Enshôko wazirhegesire okurhengamwo enyîshi, ezi nyîshi ziyisha aha karhî k’entondo.

11 Ezi nyîshi zinywêsa ngasi c’erubala, ezîra ensimba zihêkakwo enyôrha.

12 Ezi nyîshi ebinyunyi biyâlikirakwo, ebi binyunyi biryogôlera omu mashaka.

13 We dômera entondo n’amîshi g’omu mpamikwa zâwe, we shalûla idaho n’eby’omu maboko gâwe.

14 We mêza ebyâsi ebihêsi bikera n’olurhendebuka lushalûla omuntu.

15 We rhuma idaho lyarhengamwo omugati lirhengemwo n’irivayi lyahiramwo omuntu orukara, lirhengemwo orhuvurha omuntu acêsamw’obusù, lirhengemwo n’ehigati omuntu agalulamwo amarhî.

16 Emirhi ya Nyakasane, enduluma z’e Libano agwîkaga yêne, kulya zirya ziyigurhe.

17 Mwo ebinyunyi biyûbakira enyôgo; emihangâli omu nduluma eyûbakira.

18 Entondo ndi zo zihà empene z’erubala olwâbuko, n’amabuye go gahà ebishegeshe olwâkiro.

19 Wàjizire omwêzi mpu gukazigera amango n’izûba limanyire amango n’emunda lizikira.

20 Okabulula omwizimya lyo obudufu burumbâna, go mango eby’erubala byoshi bija byahulahula.

21 Go mango omwâna w’entale alakira omuhanya, go mango omwâna w’entale ahûna Nyamuzinda eci alya.

22 Erhi lukula arhanda lyo bifuluka, go mango bihêka îrò oku ncingo zâbyo.

23 Go mango omuntu arhabâlira omukolo, agulegererekwo birinde bijinga.

24 Mushâna Nyamwagirwa emikolo yâwe guli mwandu! Burhimanya wayijiragamwo yoshi: igulu lyoshi liyunjwîre biremwa byâwe.

25 Olole oku enyanja eluga n’oku egaliha: ebiyôga muli yo birhankaganjwa, ebinyinyî n’ebinênênè mwo bishundwa.

26 Amârho mwo gagera, n’envubu, biremwa byâwe nabyo, mwo bishârhira.

27 Byoshi byoshi wêne bilokakwo, mpu obiyikuze amango gâbyo gahika.

28 Nk’obihire binayunamirize birhôlogole, okabumbula enfune zâwe lyo bilugirwa.

29 Okafulika obusù bwâwe binakomakomye, okabinyaga omûka binafè bicîshubirire omw’idaho.

30 Okarhuma omûka gwâwe ebindi binalemwe; n’obusù bw’igulu onabuhindule buhyâhya.

31 Irenge lya Nyakasane liyimbwe ensiku n’amango: nêci Nyakasane acîtakir’emikolo yâge.

32 Kàli akalola okw’igulu linageremw’omusisi wâni! akahuma oku ntondo enatumbûke cigî!

33 Oku nciyisa omûka erhi kuyimba nanyimbira Nyakasane, oku ncihabà erhi kuziha nanzihira Nyamuzinda wîrhu olulanga.

34 Ebinwa byâni bimununire mâshi: nânacîzigiriza muli Nyakasane.

35 Abanya-byâha barheng’en’igulu, banyankola-maligo nabo barhacihabâga. Murhima gwâni kuza Nnâmahanga!