Aleluya!

1 Mukuze Nyakasane bulya ali mwinjà, bulyâla olukogo lwâge luli lw’ensiku n’amango.

2 Bakuderhe abà Nyakasane àcungwîre boshi, balya boshi àkûzire omu nfune z’omubisha.

3 Balyâla àhamagaliraga ndêko nguma kurhenga omu mahugo, kurhenga emahanga g’ebushoshôkero bw’izûba kuhika emunda lizikira, kurhenga emahanga g’e mwênè kuhik'emukôndwe.

4 Bâli omw’irungu, omu mpinga, lêro bahabuka, balonza enjira y’ekà bayibula.

5 Bashalika banagwârhwa n’enyôrha, bayumva kukola kufà.

6 Bayâkûza Nyakasane muli obwo bulagîrire bwâbo, abalikûza muli ago malibuko.

7 Abalangûla enjira nnungêdu, erya yabahisa ahâli enyumpa.

8 Bavuga Nyakasane omunkwa oku lukogo lwâge, bamuvuga omunkwa oku binjà àjirîre ababurhwa n’abantu.

9 Bamuvuga omunkwa bulya àshalwîre omushalye, anagaza owali bufà n’enyôrha.

10 Bâli batamîre omu mpehema, omu ndundulya y’omwizimya, bànali bashwêke n’emigozi y’obuhanya n’ey’obudagulè,

11 kulya kubà bâli barhanzirirhenguha akanwa ka Nyamuzinda, bànali barhanzirigayaguza irhegeko ly’Ow’Enyanya bwenêne.

12 Lêro emirhima yâbo ayibarhuza omutula, gwabadandabaganya banabula cirhabîre.

13 Bayâkûza Nyakasane muli obwo bulagîrire bwâbo, abalîkûza kuli ago malibuko.

14 Abakûla omu mpehema, omu ndundulya y’omwizimya, emigozi yàlibashwêsire ayitwa.

15 Bavugage Nyakasane omunkwa oku lukogo lwâge, bamuvuge omunkwa oku binjà ajirîre ababurhwa n’abantu.

16 Kulya kubà àvungunywîre enyumvi z’amarhale, ashangula orhuhamikizo rhw’ecûma.

17 Balwâla erhi byâha byâbo birhuma, balibuka barhindibuka erhi bubî bwâbo burhuma.

18 Baderha mpu balye akalyo bayumve karhabali oku murhima; babona ekola ekuzimu bayêrekîre.

19 Bayâkûza Nyakasane muli obwo bulagîrire bwâbo, abalîkûza kuli ago malibuko.

20 Arhuma oluderho lwâge mpu lubafumye, lunabalikûze oku lufù.

21 Bavugage Nyakasane omunkwa oku lukogo lwâge, bamuvuge omunkwa oku binjà ajirîre ababurhwa n’abantu.

22 Banarherekêre enterekêro z’okumukuza, n’ebijiro byâge babiyimbe n’enshagadu.

23 Abàli omu bwârho mpu bayikire enyanja, mpu bayikire enyanja bajè burhunzi,

24 Babona ebi Nyakasane abamwo, Babonera ebisômerîne byâge omu karhî k’enyanja.

25 Abà nk’aderha n’akanwa: empûsi y’omulaba yazûka, amîshi gakazilwîra omu nyanya.

26 Garhalihamira emalunga, garhaliyandagalira ekuzimu, omurhima gwâbo gwashalama.

27 Batabataba banadandabagana nka balalwe, obulenga bàkazagicîkubagira bwahirigirha.

28 Lêro bayâkûza Nyakasane muli obwo bulagîrire bwâbo abalikûza kuli ago malibuko.

29 Erya mpûsi ndârhi ayigombya hyashuba hiboho hyashungurha, obukali bw’erya nyanja bwalemba.

30 Basîma erhi babona akahwenyenye kabà, abahêka abahisa ah’izîko balonzagya okuhika.

31 Bavugage Nyakasane omunkwa oku lukogo lwâge, bamuvuge omunkwa oku binjà àjirîre ababurhwa n’abantu.

32 Bamukuze omu ndêko y’abantu, banamuyimbire irenge lyâge aha karhî k’abagula.

33 Ezàli nyîshi azihindula mpinga, n’ezàli nshôko azihindula idaho lya canda.

34 Ecihugo câkazâgiyêra acîhindula mushenyi gwa munyu, erhi bubî bwa bantu bamwo burhuma.

35 Eryàli irungu alihindula cidêka ca mîshi, n’idaho lyàli lya canda alihindula nshôko zàburha enyîshi.

36 Ayûbasamwo abantu bâli bufà n’obuligo, n’akalengwe, bayûbakamwo olugo lwanakaderhwa.

37 Bahinga amashwa, bagwîka emizâbîbu, barhenzamwo birhali binyi.

38 Abagisha baluga bwenêne, abahà na bintu birhali binyi.

39 Ci kwône bajà banyiha, gashuba mâhungà erhi kuhanyagala n’okulagîrira kwâbo kurhuma.

40 Agaya abaluzi bwenêne, àbahabuliraga omw’irungu, omu nyâmà wandya,

41 akula omukenyi mwo bulya buhanya, analuza emilala yashuba minji nka masô.

42 Omushinganyanya abwîne anasîmire, ci ababî boshi aha irhama bôhe banacigwêrhe.

43 Oli murhimanya, ashimbe ebi byoshi, arhimanye anakengêre bwinjà emikolo ya Nnâmahanga.