2 Omurhima gwâni guli muzibu Nyamwagirwa, omurhima gwâni gurhahombagana; nkola nakuzihira nnankuyigânire.

3 Tulûka murhima gwâni; tulûka lulanga lwâni, tulûka nzenze yâni, nkola natula obucè buzûke.

4 Nâkukuza omu karhî k’amashanja, Nyamwagirwa, nâkuzihira olulanga omu karhî k’ab’ekulî;

5 bulyâla olukogo lwâwe luli lunji: luhisire emalunga, oburhabêsha bwâwe nabwo, buhisire oku nkuba.

6 Nyamuzinda mâshi orhangibà nka wacîyerekanira oku nyanya z’amalunga, irenge lyâwe libonekane omw’igulu lyoshi.

7 Orhurhabâle n’okuboko kwâwe onarhuyumve, lyo abarhonyi bâwe balobôka.

8 Nyamuzinda erhi ali omu ngombe yâge, ayisha erhi nkola nayimuka njigaba Siyoni, n’olubanda lwa Sukoti ndugabire bandi.

9 Erhi ishwa lya Galadi libà lyâni n’erya Manasè kwo na kwo, Efrayimu yêhe yo mpenzi y’irhwe lyâni na Yûda ye kayundwè wâni.

10 Mowabu lwo lwôgero ncîkalabiramwo, Edomu yêhe namugera oku lwêru lw’enda, na Filistiya namuhima kano kanya.

11 Lêro ndi wakampisa omu lugo luzibu? Ndi wakampisa cingana e Edomu wâni?

12 Nnâmahanga kali we wanarhucinagizagya wâni! Kali orhacidwîrhi wayisha okarhabâla mwe n’abalwî bîrhu!

13 Mâshi mâshi orhurhabâle kw’oyu mubisha, bulyâla okurhabâlwa n’abantu kuli busha.

14 Rhwakola emyônè oku burhabâle bwa Nnâmahanga, yêne ya wâjonjaga abashombanyi bîrhu.