1 Okubundi Malahika wa karhanu abûha omu mushekera: nanacibona e­nyenyêzi*9, 1 Eyo nyenyêzi ali malahika mubî, erhi shetani. yarhengaga emalunga erhogîre oku idaho. Bayihêreza olwigulo lw’enyenga y’ekuzimu. 2 Nayo yayigula eyo nyenga y’ekuzimu. Mw’eyo nyenga mwanacirhenga ecigî ciri nka mugî gw’omu luganda lunênênè, izûba n’ecirêre byashuba mwizimya erhi ogwo mugî gw’omu nyenga gurhuma. 3 Gulya mugî gwanacifugumukamwo enzige; zàgwa oku idaho, zanahâbwa obuhashe buli aka bulya engobe†9, 3 «engobe», ahandi rhuyidesire «ihiri-joka», ye baderha «scorpion» omu cinfaransa zijira en’igulu. 4 Zabwirwa mpu zimanye zankajira byâsi by’aha nshi zahumakwo, nîsi erhi bwâsi erhi murhi, aha nyuma ly’abantu barhalikwo ecimanyîso ca Nyamuzinda oku malanga gâbo. 5 Zabwirwa mpu zirhabayirhaga, ci mpu zibalîse n’amagala myêzi irhanu; n’akababo kâzo kwo kàli nka kula engobe eluma omuntu. 6 Muli ezo nsiku obwo, abantu bakolaga bayish’ilonza olufù banalubule; banacîfinje okufà, n’olufù lubayâke! 7 N’ezo nzige owazibona kwo ankanamanya mpu biterusi byagungêza okulwa; amarhwè gâzo gàlikwo ebiri nka bimanè bya masholo; n’obusù bwâzo buli nka bantu. 8 Emviri zâzo kwo ziri nka za bakazi, n’amîno gâzo kwo gayôsire nka ga ntale. 9 Ebifuba byâzo kwo biri nka mpenzi za cûma, n’omululumo gw’amashala gâzo kwo guyôsire nka kulyâla ebiterusi byajà oku bîrha biyisha byabulula babomboro. 10 Emicira yazo erikwo orhubabo, nka kulyâla eya bacilumira-habiri enayôrha; n’omu micira yazo mwo obuhashe bwâzo bw’okuherêrekeza abantu myêzi irhanu bubà. 11 Omwâmi wazo ozikulîre, y’olya malahika w’omu nyenga; izîno lyâge omu ciyahudi ye Abadoni‡9, 11 Abadoni omu cihebraniya: Malahika w’omu nyenga, erhi w’omu kuzimu; ye Shetani; Apoliyoni omu cigereki: olêrha obuhanya, olêrha nyamanjà, kaheza., n’omu cigereki ye Apoliyoni. 12 Ibala lirhanzi eryo lyamâgera, agandi mabala abiri ago gakulikire.

13 Malahika wa kali-ndarhu naye agubûhamwo erhi na mushekera. Nanaciyumva izù lyahubuka aha marhwêrhwè anni g’olûsho lw’amasholo luli e­mbêre z’amasù ga Nyamuzinda. 14 Eryôla izù lyabwîra Malahika wa kali-ndarhu, nyakubûha omushekera, erhi: «Lîka bala Bamalahika bâni bashwêkîrwe aha lwîshi lwa Efrata». 15 Balya Bamalahika oku banali bâni banacilîkwa, bakàlingûza ensà n’olusiku n’omwêzi n’omwâka bayirhamwo ecihimbi ca kasharhu c’abantu. 16 Omurhwe gw’abalwî balwîra oku biterusi gwàli gwa rhulorho§9, 16 Ehilorho byo bihumbi cihumbi, na rhulorho cihumbi yo njavu. Rhulorho magana abiri kwo kuderha 200.000.000. magana abiri: nayumvîrhe banganjira bâli banga. 17 Ntyâla kwo nabwîne ebiterusi n’ababitamîrekwo bayôsire erhi mbà ndwîrhe nabona: bâli bagwêrhe empezi ziri nka masêsè ga muliro, zinashushire omukara gw’ecibogo n’ecibiriti. Amarhwe g’ebiterusi kwo gali gayôsire nka ga ntale, n’ekanwa kâbyo yakazâg’irhenga omuliro n’omugî n’ecibiriti. 18 Abo banyamanjà oku bali basharhu bo bayîsire ecihimbi ca kasharhu c’abantu: bahungumuka n’omuliro n’omugî n’e­cibiriti byakâg’irhenga ekanwa k’ebiterusi. 19 Bulya, nêci, obuhashe bw’ebyo biterusi ekanwa bubà n’omu mucira; emicira yabyo kwo ebà nka njoka; ejira amarhwe, n’ago marhwe go enêshamwo abantu.

20 Ci abantu basigalaga, abarhahungumukaga n’âbo banyamanjà, barhaderhaga ciru mpu bacîyunjuze oku bijiro by’amaboko gâbo: barhalekaga okukâgashâniza abashetani n’enshushano z’amasholo, n’ez’amarhale n’emiringa, n’ez’amabuye n’emirhi, n’obwo oku ziri zirhankabona, zirhankayumva, zirhankanacishegûla. 21 Barhagokôlaga obushumûsi bwâbo, n’obukurungu bwâbo, n’okuhusha kwâbo, n’obushambo bwâbo.