1 Okuhandi nanacibona owundi Malahika muzibuzibu amanuka emalunga, ecitù erhi cimuhundikîre, n’omutirigongo erhi gumuli oku irhwe; obusù bwâge erhi buli nk’izûba, n’amagulu gâge erhi gali nka mitungo ya muliro. 2 Ali afumbasire ehitabu bibungûle omu nfune. Anaciheba okugulu kulyo oku nyanja, n’okulembe oku idaho, 3 ayâma n’izù linene nka kulya entale eluluma. Oku anayâma ntya, Emilazô*10, 3 Eyo Milazô nda lyo izù lya Nyamuzinda. nda yagwîra yakungula. 4 Erhi eyo Milazô nda ebà yamâkungula, nankolaga ndi nti nyandike, nanaciyumwa izù lyarhenga emalunga, erhi: «Ebyôla Emilazô nda edesire, obihebekwo akahamikizo, omanye wankanabiyandika». 5 Okuhandi olya Malahika nabonaga ayîmanzire oku nyanja n’oku igulu, alambûlira okuboko kulyo emalunga, 6 alahira Ozîne omu myâka n’emyâka, owalemaga amalunga n’ebigabâmwo, n’igulu n’ebimubà, n’enyanja n’ebimubà, mpu ntà mango gacihali, 7 ci mpu e­nsiku banayumve Malahika wa kali nda abûha omu mushekera, erhi ihwe lya Nyamuzinda lyamâyunjula, nk’oku abwîraga bambali bâge abalêbi.

8 Liryal’izù narhangag’iyumva emalunga, lyashub’inganîza, erhi: «Ogend’iyanka ecitabu cibungûle omu nfune za Malahika oyîmanzire oku nyanja n’oku igulu». 9 Nanacikanya, najà emunda Malahika ali, namubwîra nti a­mpêreze cirya citabu. Ambwîra, erhi: «Yankàco, onacivûgusè; cakululira hano cikuhika omu nda, ci ekanwa cakununira nka bûci». 10 Nayanka cirya citabu omu nfune za malahika, nacivûgusa; omu kanwa erhi ciri cinunu nka bûci, ci erhi mbà namacirya, canshakamiza enda. 11 Banacimbwîra, mpu: «Kukwânîne oshub’ilêbera emilala n’amashanja n’endimi na bâmi banji».