1 Orhalwîsagya omukulu, bulya akanakulagîriza. 2 Orhalwâga mwe n’omugale, bulya ankakuhima kuhonga: omanye oku amasholo gahezize banji, galembya ciru n’omurhima gw’abâmi. 3 Orhajâga kadali mwe na kadegende, kuli kuhira enshâli oku cîko. 4 Orhajiraga obuzâla mwe n’omuntu walezirwe kubî, bulya yêhe anajâcira na bashakulûza b’omuntu. 5 Orhakalihiraga omunya-byâha ocîyunjuzize, kengêra oku rhweshi rhwabîhire. 6 Orhagayaguzagya omushosi, bulya nîrhu rhwankacishosihala. 7 Orhacîshingiraga okufà kw’owundi, kengêra oku olufù luli lwîrhu rhweshi.

8 Orhagayaguzagya akanwa k’abakulûkulu, kanji-kanji ogaluke omu binwa byâbo, bulya bo bakuyigîriza oyîgîrire, omanye n’obulenga abantu bashigamo. 9 Orhakengulaga ebinwa by’abashosi, bulya bo barhanziriyîgira oku babusi bâbo, bo wâyîgirakwo okucîrhonda, n’obulenga bw’okushuza nka mugula.

10 Orhakolêzagya enshâli z’omunya-byâha, bulya engulumira y’omuliro gwâge yakuyôca. 11 Omanye obukali bw’owundi muntu bwakakuhabîsa, gwakanabà murhego gwarhuma walogorha. 12 Orhahâga omuntu okulenzire misî akantu mpu wamuhoza, n’okamuhoza oderhe oku wanahezirwe. 7. 36: Wayâka ebyâha: oyôrhe oli mwinjà ngasi lusiku ly’ôbà n’iragi ly’okuhà mwinjà olusiku luzinda. 13 Orhayîmangiraga owâlya omwenda gukulenzire buli, okamuyîmangira onacîrheganyagye n’okulyûla. 14 Orhajâga lubanja mwe n’omucîranuzi, bulya hano balutwa, ye baluhà. 15 Orhabalamaga mwe n’ecishungu, bulya akuhêka olunda orhîshi: okw’ali kw’anagenda, arhabwîrwa: isirhe lyâge lyânakuyîrhira omu mpinga mwe naye. 16 Orhajâga kadali mwe n’omuntu okunira duba, orhanageraga mwe naye aharhabà nyumpa, bulya akômerîre okubulaga omukò. 17 Ihwe lyâwe orhalibwîraga encinganyi, bulyâla cirhakamanyibîka ihwe lyâwe. 18 Ecijiro c’okuyôrha ciri mahwe-mahwe, orhacikolaga embere z’ow’e­mbuga, bulyâla orhamanyiri bici akakusingira. 19 Orhabohôleraga ngasi yêshi omurhima gwâwe, orhacîkebagwa n’iduba mpu akola wâwe.