1 Orhayâgalagwa na mukâwe, orhamuhâga enkengêro z’okukujirira kubî. 2 Orhacîhânaga emw’omukazi, wakanabona yekola okukulîre. 3 Orhashimbaga omukazi w’ecishungu, wakanagwa omu mirhego yâge*9, 3 9, 3: Emirhego yâge: lolà Mig 7, 6-27; 23, 27; 29, 3.. 4 Orhakômeraga omukazi mwîmbiza, wakanagwârhwa omu menge gâge. 5 Orhasingirizagya omunyere, wankanahanirwa haguma naye. 6 Orhacîhiraga omu nfune z’embaraga, yakanakuyûsa ebirugu. 7 Orhasingirizagya hoshi-hoshi omu lugo, orhakômeraga n’enjira zàhàmbire. 8 Omuhya mwinjà, orhahîra okamukonolera amasù, orhanahîraga okasingiriza mukà bêne. Banji barhebirwe n’iranga ly’omukazi, amagene gâbo gayâka nka muliro. 9 Oleke amazâla haguma n’omukazi ogwêrhe omu mwâge, omurhima gwâwe gwankanahya n’obwinjà bwâge, obone amagene gamakuhira ecîko.

10 Orhalekaga omwîra wa mîra, omuhyâhya arhamulushe. Omwîra muhyâhya, mavu ga cibabe, linda gahole ly’oganywa bwinjà. 11 Orhayâgalagwa n’okubêrwa kw’omubî, orhamanyiri obuzinda bwâge. 12 Orhakungaga okubêrwa kw’ababî, kengêra oku barhabule bwahanirwa hano igulu. 13 Oyâkire ogwêrhe obuhashe bw’oukuyirha abantu kulî, ntyo ecôbà c’olufù cakurhengamwo. N’erhi wankamuyêgêra, omulâbe bwinjà, omanye akurhenzamwo omûka. Omanye bwinjà oku emirhego ekuzonzire, n’oku elugerêro oli. 14 Okômerane mwe n’omulungu wâwe nk’oku onahashire, onakazidôsa abagula ihano. 15 Olonze okukâshambâla mweshi n’abantu nkana, n’enshambâlo yâwe eyêrekere irhegeko ly’Ow’Enyanya. 16 Abashinganyanya babè bo bîra mulîra haguma, orhanalimbiraga okurhali kurhînya Nyamuzinda. 17 Bushanja bwa mulenga bukengwa, yêhe muntu okulîre olubaga akwânîne abè mulenga omu binwa. 18 Kishiderha kuyôbohwa ayôbohwa eka, na kadegende arhabonwakwo.