1 Omurhegesi murhimanya kulanga alanga ecihugo omu njira nyinjà, n’obukulu bw’omurhimanya bunarhinde bwinjà. 2 Oku mwâmi ayîmire, kw’anashîgwa, n’oku omurhambo ali, kwo n’abantu bâge banahimba. 3 Mwâmi muhwinja, buhanya oku bambali, bukengêre bwa barhegesi buyinamula ecihugo. 4 Nyamuzinda ye nn’oburhegesi bw’igulu, amango abwîne go anagoshôla omurhegesi okwânîne. 5 Okubêrwa kw’omuntu emwa Nyamuzinda kurhenga, ye hà abajira amarhegeko irenge.

6 Oleke okubîkira owinyu akarhinda ciru ankabîha, oleke okuhingira omujina. 7 Obucîbone bugayîsa Nyamuzinda n’omuntu, bombi kandi barhabona oku bulyâlya. 8 Ecihugo cinalye ecâbo oburhegesi, obulyâlya, okuniga n’ensaranga birhumire. 9 Cirhuma obudaka n’oluvù bicîbona, n’obwo oku acizîne erhi n’obulà mîra bwabayaga? 10 Endwâla y’omujânyi erhumva bufumu, mwâmi ene, irhondo erhi afîre. 11 Owafîre gukola munyama gwa bigûku, nsimba na mivunyu. 12 Okuleka Nyamuzinda, n’okurhenzako Lulema omurhima, yo ntangiriro y’obucîbone. 13 Omurhondêro gw’obucîbone co câha. Bulyâla ecâha lyo igwârhiro ly’obucîbone, n’omwîra waco buhanya alêrha eka. Co carhumire Nyamuzinda amuhà obuhane budârhi, kuhika aha buzinda. 14 Nyamuzinda arhenzize abagale oku ntebe, ahebakwo ahatûdu. 15 Nyamuzinda àkûzire abacîbonyi, n’aha mwâbo ahiraho abîrhôhye. 16 Nyamuzinda ashâbire ebihugo by’amashanja, abishâba kuhika oku ciriba ciri omu idaho. 17 Hali n’amango abimanywîre, abishâba lwoshi, abizâza omu igulu birekikengêrwa. 18 Obucîbone burhali bulume, n’obukunizi bw’okuyîrha burhali bw’oku bûko bw’omukazi.

19 Bûko buhi bukwânîne olukengwa? Bûko bw’omuntu. Bûko buhi bukwaninc olukengwa? Bûko bw’abarhînya Nyamuzinda. Bûko buhi bukwânîne okugaywa? Bûko bw’omuntu. Bûko buhi bukwânîne okugaywa? Bûko bw’abavuna irhegeko. 20 Omurhegesi anakengwe na bene wâbo, n’abarhînya Nyamuzinda banakuzibwe naye. 21 Okurhînya Nyakasane gw’omurhondêro gw’okuzihwa; obucîbone n’obuzibu bw’omurhima gw’omurhondêro gw’okugayaguzibwa. 22 Omugale, omurhonyi, nîsi erhi omukenyi, alimbîre okurhînya Nyamuzinda. 23 Kurhakwânîni okugayaguza omukenyi w’obukengêre, kurhashigânîni kandi okuhà enkola-maligo okukengwa. 24 Omurhegesi, omucîranuzi bali bakulu, kukwânîne okubakenga, ci ntà mukulu olushire omuntu orhînya Nyamuzinda. 25 Omujà murhimanya anashigwe n’abalengerîre, n’omuntu wayigîrizibwe bwinjà arhacîduduma.

26 Omanye wakacîbona bwenge nka oli omu mukolo, omanye wakacîkunga n’obwo oli omu bulagîrire. 27 Omuntu wâkola, abè mugale ye mukulu, aha muntu ogenda ocîkunga n’obwo ntyo alâla. 28 Mwâna wâni, ocîkunge n’olugero, olole oli wa lugero lunganaci. 29 Omuntu ocîbîhire yêne, ndi wakamunywêra emizimu? Nîsi ndi wankakenga ocîgayire yêne? 30 Omukenyi akengerwa murhima gwâge, n’omugale bamukengêre ebirugu byâge. 31 Mukenge omu bukenyi, hano agâla lyôhe kurhi? Mugaywa omu bugale, lyôhe hano akena kurhi?