1 Nyamubâho ensiku n’amango ye walemaga byoshi. 2 Nyamuzinda yêne mushinganyanya. 3 Ntà wundi omulushire, ye rhegeka igulu n’akashanashanwe, byoshi bikenga obulonza bwâge, bulya ye mwâmi wa byoshi, oku buhashe bwâge ye berûla ebitagatîfu n’ebirhali bitagatîfu. 4 Ndi àhîre obuhashe bw’okuderha ebijiro byâge, na ndi wankavûlula ebinja byâge? 5 Ndi wankagera obuhashe bw’obwâmi bwâge, na ndi wankaganira obwonjo bwâge? 6 Ntâco omuntu ankanyihyakwo na ntâco ankayûshûlakwo, ntâye wankavûlula ebinja bya Nyamuzinda byoshi. 7 Erhi omuntu ayûsa, gwo gukola murhondêro, erhi kwo kukola kurhangira, n’erhi ahusa kubè kurhângâla*18, 7 Kurhângâla: ebya Nyamuzinda birhaheka, omuntu akwânîne alole, asômerwe, kandi aharâmye owabijiraga..

8 Omuntu abà cici? Abà wa bici? Ngahi ayinjihira na ngahi abihira? 9 Akalamo kâge? Emyâka igana nk’eri minji. 10 Murhônyi gudômwa omu nyanja, mbeke ya mushenyi, kwo eyo myâka eri embere z’ensiku n’amango. 11 Co cirhuma Nyamuzinda alember’abantu, co cinarhuma anabarhulirako olukogo lwâge 12 Abwîne, amanyire oku obuzinda bwâbo bubà buligo, co cirhuma aluza obwonjo. 13 Omuntu ababalira omulungu wâge, ci Nyamuzinda yêhe ababalira ngasi muntu yêshi, anahanûle, akubûle, ayîgîrize, arhange kul’omungere anajira obusò bwâge†18, 13 Obusò bwâge: Nyamuzinda arhahimwa lukogo oku bantu, lolà 2 Mak 6, 13; Bush 12, 19…. 14 Olukogo lwâge lubà oku bantu bakulikîre enjira yâge, balya balongereza okushimba amarhegeko gâge.

15 Mwâna wâni, aminjà ojirire omuntu orhagakulikizagyako bijâci, n’ebi wahâna, orhabihânaga wanacîduduma. 16 Olumè lunanyihye idûrhu bulya? Akanwa kinjà kalushire okuhâna. 17 Nêci, akanwa kinjà kalushire okuhâna, ci omuntu nkana byombi haguma abihira. 18 Omusirhe anabè arhahâna anabulijâcirana, n’omwâgalwa anahâne ehi alakira.

19 Embere ojè lubanja, orhangidôsa emirhima, ocîbuke oku orhacilwâla. 20 Ocîyâze embere ojè lubanja, hano olujà, bakulîka. 21 Ocîrhohye embere olwâle, yêrekana oku ocîyunjuzize nka wamajira ecâha. 22 Harhajiraga ecakuhanza kwayûkiriza eciragâne câwe bwacibona, orhalindaga olufù mpu lyo ôbà mwinjà. 23 Gerêreza embere olaganye Nyamuzinda, olekiyôrha nk’owarhangula Nyamuzinda. 24 Kengêra obukunizi bw’ensiku nzinda, amango g’okucîhôla, amango Nyamuzinda akengulana. 25 Amango oyêzize, kengêra ecizombo, n’amango ohirhire, kengêra obukenyi n’obuligo. 26 Kurhenga sêzi kuhika bijingo, akasanzi karhayimanga, byoshi kugera bigera duba embere za Nyamuzinda. 27 Omurhimanya kucîlanga acîlanga muli byoshi, omu nsiku z’obugoma, anacîlange oku bulenzi. 28 Omuntu w’obukengêre yêshi ayishi oburhimanya; owabuhisirekwo kukûnga abukûnga. 29 Abantu b’obukengêre n’abadesi nkana nabo bashibirire oburhimanya, n’ebi baganîra eri migani ekwânîne obushinganyanya.

30 Orhayêmêraga amagene g’àbakulula, oshube oku nyîfinjo zâwe. 31 Okushimba enshumi z’amagene gâwe, kwanarhuma abashombanyi bâwe bakushekera. 32 Omanye wakarhonya obununîrizi bw’amasîma, orhayinjibanaga ab’enkômedu ziri ntyo. 33 Orhajiraga ensiku nkulu n’ensaranga mpozanyo, amango enshoho yâwe eri nyûmu.