24
Oburhimanya bwaderha nka muntu
Oburhimanya bukolaga bwacivuga, bukolaga bwarhangifekembera omu karhî k’olubaga*24, 1 Oburhimanya bwaderha: ahâla oburhimanya kwo buli nka muntu, n’eci cigabi kwo ciri nka murhima gw’eci citabu. Lolà Mig 8, 22. Omu Liturjiya katolika, ebi binwa Ekleziya ebiyêrekezize Bikira Mariya.. Bwamâderha ntya omu ndêko y’Ow’enyanya, bwamâyêrekana irenge lyâbwo embere z’Obuhashe, erhi: «Ndi nkonôka y’oku Kanwa k’Ow’Enyanya, nayisha nacîbulula nka lwikungu nabwîkira igulu. “Aha mwâni, emalunga, entebe yâni gwàli mulunga gwa bitù”. “Niene, kuno na ndi, nazungulusire engo y’emalunga, najîre kuli kuhika ekuzimu”. “Obwâmi bwâmi bwagandazize omu nyanja, omu igulu, oku ngasi lubaga n’oku ngasi cihugo”. “Emwa boshi nalonzize ahantu nâdêkerera, nalonzize ngahi nâgwîke icumbi lyâni”. “Lêro Lulema w’igulu anacimpa irhegeko, owandemaga angwikîsa ihêma lyâni, àmbwîra”, erhi: “Yûbaka muli Yakôbo, ojè omu kashambala k’Israheli”. “Embere ly’amango, kurhenga omurhondêro ly’andemaga, ensiku n’amango erhi ho mbà”. 10 “Omu cihando citagatîfu, embere zâge nagashâniza, na ntyo nacumbika omu Siyoni24, 10 Narhumikîre omukolo omu ka-Nyamuzinda guli mukolo gwa Burhimanya: lolà 24, 23…,” 11 “nabêra omu Kinjà k’olugo, omu Yeruzalemu mwo obuhashe bwâni bubà”. 12 “Namezire emizî emw’olubaga lw’irenge, omu kwa Nyamuzinda, omu cishumba câge”. 13 “Nakuliremwo nka nduluma y’e Libano, nka murhi oku ntondo ya Hermoni”. 14 “Nakula nka mubô gw’En-Gadi, nka mirhô ya bwâso bw’e Yeriko, nka muzêti gunagîrîre omu lubanda, nakula nka nduluma ya murhi”. 15 “Obwehe bwâni buli nk’obw’ecinamoma na nk’obw’omusipalata, akisûnunu kâni kali nk’ak’enshangi ntumîrira, nk’ak’egalbanumo, onikisi n’obubâni, nka cidûrhu ca nshangi omu Cihando”. 16 “Nalandiza amashami nka murhi gwa terbenta, mashami ga bwinjà n’irenge”. 17 “Kwo ndi nka muzâbîbu gulandizize emirhô minjà-minjà, n’obwâso bwâni ebà mburho y’irenge n’obuhirhi”. 18 “[Nie nnina w’obuzigire nkana, nie nnina w’olukengwa, nnina w’obumanye n’obulangâlire; nahîrwe lwoshi abâna bâni boshi, balya Yêne agoshôlaga kurhenga ensiku n’amango.]24, 18 Obushinganyanya bwayishigererwako Yezu Kristu. Lolà Ywn 14, 6.19 “Muyishe emwâni, mwe mucînyifinja, mulye oku mburho yâni”. 20 “Bulya okunkengêra kulushire obununu bw’obûci, akashambala kâni ko kinjà aha cigukulu c’obûci”. 21 “Abandya barhakaleka okushwîra emunda ndi, n’abanywa barhakagambwa”. 22 “Oyumva ebi mmubwîra, arhankabibêra burhè, n’abajira emikolo yâni barhakahirima omu câha”».
Oburhimanya n’Irhegeko
23 Ebyo byoshi citabu c’Endagâno ya Nyamuzinda w’Enyanya eco. Irhegeko lyàmanyisibagwa na Mûsa, ko kashambala kàsigiragwa endêko za Yakôbo. 24 Murhalekaga okucîzibuhya muli Nyakasane, mumusêrekwo lyo amuzibuhya, Nyakasane w’Emirhwe yêne Nyamuzinda, buziraye, ntawundi mu­ciza. 25 Er’Irhegeko lyo liluza oburhimanya nka mîshi ga Pishone, nka kula olwîshi lwa Tigre luyunjula amango emyâka eyêzire; 26 lyo liluza obukengêre nka mîshi g’Efrati, nk’aga Yordani amango bakalala; 27 lyo lihâna enjira nk’olwîshi lwa Nili, na nka Gihîni omu nsiku bahumbûla emizâbîbu. 28 Oku omurhanzi arhaciyûsa okulimya, kwo n’omuzinda aciri kulî nalyo. 29 Bulya obukengêre bwalyo bulushire enyanja bunji, n’emihigo yalyo yo miri kulusha enyenga. 30 Niono, kwo ndi nka mubunda gwârhenga omu lwîshi, nka hîshi hihesire omu ishwa ly’amasîma. 31 Nàdesire, nti: «Nkola nadômerera omu kwâni, ngeze amîshi omu ishwa lyâni». Lêro nabona omubunda gwâni gwahinduka lwîshi, n’olwîshi yashuba nyanja. 32 Nkolaga nalomeka enjira kurhenga sêzi, akamole kabone kuhika emahanga. 33 Navangula enyigîrizo nka bulêbi, zihike n’oku maburhwa gali nyuma. 34 K’obwîne: arhali nie nacîlongeza, ci nakolera balya boshi bazilonza.

*24:1 24, 1 Oburhimanya bwaderha: ahâla oburhimanya kwo buli nka muntu, n’eci cigabi kwo ciri nka murhima gw’eci citabu. Lolà Mig 8, 22. Omu Liturjiya katolika, ebi binwa Ekleziya ebiyêrekezize Bikira Mariya.

24:10 24, 10 Narhumikîre omukolo omu ka-Nyamuzinda guli mukolo gwa Burhimanya: lolà 24, 23

24:18 24, 18 Obushinganyanya bwayishigererwako Yezu Kristu. Lolà Ywn 14, 6.