1 Iragi lyâge omulume ojira omukazi nkana, omubalè gw’ensiku zâge gwayûshûka kabiri. 2 Omukazi nkana busîme emw’ibà, ibà alama n’omurhûla emyâka yâge yoshi. 3 Omukazi nkana ebà nshôkano yâgoyâgo, eshobâlwa n’abalume barhînya Nyamuzinda. 4 Babè bagale erhi bakenyi, busîme buli emurhima gwâbo, ensiku zoshi busù bwa nshagali. 5 Hali bisharhu nyôboha: n’eca kani musisi cingezâmwo: obunywesi bulumira eka, okunyagwa kw’olubaga, okuhêka owundi lubanja oku busha: ebyo bibà bibî kulusha olufù; 6 ci kuli nka kurhîngamira omuntu, gali malumwa omukazi okuyâgalwa n’owâbo, okwo kwoshi abâ nyamanjà olêrhwa n’akalimi. 7 Omukazi mumînya, murhamba gwa mpanzi bashwêsire kubî; okacîhamba mpu wamugombya kuli kugwârha cilumira-habiri. 8 Omukazi mulalwè ali wakujira omuntu burhè, enshonyi acîbonêsa zirhayibagirwa. 9 Omukazi w’ecirala omu masù abonekera, kukema-kema kwâge kumuyêrekana. 10 Omanye omunyere oyengehusire kubî, orhamufume hano abona obuzamba bwâwe. 11 Omanye amasù gahwîremwo enshonyi, orhacisômeragwa hano gakuhira omu mashumi. 12 Kw’ayâshama aka mubalama enyôrha egwêrhe, amîshi ashimanyire go ananywa, obugonyi bwâge ntaho arhabuhêka, omubiri gwâge aha ngasi mulindizo agurhege ngasi myampi-izinga. 13 Obwinjà bw’omukazi busîme bulêrhera ibà, obukengêre bwâge misî bumuyûshûlira. 14 Omukazi orhaderhêra ebà ngalo ya Nyamuzinda, oyu balezire bwinjà ntâco ankagererwakwo. 15 Omukazi ocîkenga abà mwinjà kabiri, ow’omurhima gucîre arhagwêrhi buhirhi akagererwako. 16 Kul’izûba lishoshôka oku ntondo za Nyamuzinda, kwo n’obwinjà bw’omukazi buyôrha omu nyumpa alimo. 17 Kula akamole kanayôrha emugamba omu ka-Nyamuzinda, kwo n’iranga linjà linayôrha oku mubiri gw’omwâna hya. 18 Mitungo ya masholo omu ciriba c’ebyûma, amagulu minjà oku rhunsisirha rhuzibu. 19 «Mwâna wâni, omanye wahemula obusole bwâwe n’emisî yâwe orhayihâga abanya-mahanga. 20 Hano ôbà wamalonza ishwa liyêra kulusha agandi g’omu cihugo, orhwêremwo emburho yâwe, kucîkubagira oburhwa bw’obûko bwâwe kurhumire. 21 Ntyo, abâna wânasige bayishikâcîkunga, bulya bamanyire oku ziri ntwâli. 22 Omukazi omuntu arhizagya arhali ciru nka bikâyiza, omukazi w’obuyumpa abà muzibu nka mulunga (gwa lufù). 23 Omukazi w’ecishungu ayishigabirwa omunya-byâha, omukazi mwîrhonzi ayishihâbwa omuntu orhînya Nyakasane. 24 Omukazi mûmaguza wahwîre kw’enshonyi kuzigira azigira okuhemuka, omukazi orhayûmaguza bwinjà ayôrha, ciru na nk’ali n’ibà. 25 Entwâli y’omukazi erhakengwa kulusha akabwa, cikwône omukazi mwîrhohye kuyôboha ayôboha Nyakasane. 26 Omukazi okengêsa ibà abâ murhimanya omu masù ga boshi, cikwône obonêsa ibà nshonyi, kugayaguzibwa agayaguzibwa omu bucîbone bwâge. Ali muny’iragi omulume ojira omukazi nkana, bulya omubalè gw’ensiku zâge hano igulu gwayûshûka kabirhi. 27 Omukazi oderhaderha na w’akajamwe gubà mushekera gutula entambala, ngasi mulume ojira owamwen’oyo arhahwa ntambala omu kalamo kâge.»

28 Hali bibiri nyumva bindumire n’eca kasharhu candwâza ecirungula: okubona owafungiraga ecihugo afà bushosi omu buligo, okubona abantu barhimanya bahirwakwo akagayo, omuntu ocîrhenza omu njira nyinjà ajà omu y’ecâha, yêhe ngôrho ya Nyamuzinda yamuyîrha.

29 Oku murhunzi, okuhima amashumi kuli kuzibu, omugulirwa, kuzibu okuyâka ecâha.