1 Omuntu ocîhôla naye arhâfume olwihôlo lwa Nyamuzinda, Nyamuzinda ye yishi oku ebyâha biganjwa. 2 Babalira owinyu obubî bwâge, lyo nâwe, hano oshenga, obabalirwa. 3 Kurhi omuntu obikîre owâbo obumvu akashenga mpu Nyamuzinda amufumye? 4 Omuntu orhaba bwonjo oku wâbo, kurhi akashenga mpu yêhe abâge ye babalirwa? 5 Ye muntu kwône abîkîre owâbo omujina, ndigi yeki abwîne wamubabalira? 6 Kengêra obuzinda, oleke okushombana, kengêra okufà n’okubola, oshimbe n’amarhegeko. 7 Kengêra amarhegeko, oleke okubîka omujina, okuze endagâno y’Ow’enyanya, oyîbagire ecijâci.

8 Oyâke entambala, wayâka ecâha, omuntu w’amagene ye nyankozi omu bâbo. 9 Omubî kavango ahira omu bîra, ye côkêza-malambo ekarhî k’abantu barhulwîre. 10 Oku enshâli ziri kwo n’omuliro gugulumira, oku entambala ekozîbwe, kw’enaluga. Omuntu arûkûza nk’oku emisî yâge enali, n’oku obugale bwâge buli, kw’anakunira. 11 Entambala y’obushâlashâla enazûse omuliro, ennongwè y’obuhwinja enabulage omukò. 12 Bûha oku isèsè omuliro guyâke, ogutwîreko guzime, obonereho obuhashe bw’akanwa kâwe.

13 Omanye kadegende n’enderhera-habiri, abo bombi bahezize abantu balicîbêrire omu murhûla. 14 Akalimi kàyimusize bantu banji, kabashandâza cihugo omu cindi; kahongwîre ebishagala bizibuzibu, kashâbira n’abarhwâli. 15 Akalimi kahulusize abakazi omu mwâbo, kabanyagîsa emyâka yâbo. 16 Oyumvîrhiza omudesi-wagwo arhaja îrò, anabule omurhûla. 17 Bashûrhe omuntu akarhi, kasiga omubambu, bamushûrhe akalimi, kamujonjaga yêshi. 18 Bantu banji bafîre n’engôrho, ci abafîre n’akalimi bo banji kulusha. 19 Iragi lyâge oyu karhasâgihikakwo, oyu karhali omu njira yâge, oyu karhasâgijira mujà wako, oyu karhasâgiziriringa n’emigozi yako. 20 Obujà bwâko bubà bujà buzibu, n’emigozi yako, migozi ya budagulè. 21 Olufù lwâko, lufù lubî bwenêne, ekuzimu yo nkulu kuli lwo. 22 Akalimi karhahasha abantu barhînya Nyamuzinda, engulumira yako erhabayâsha. 23 Abacîrhenza kuli Nyamuzinda, yo minyama yako, engulumira yako erhazima muli bo, kwo kabahiva nka ntale, kabashangule nka ngwi. 24 Yumva: oyûbake ecôgo c’emishûgi aha mwâwe, osêze ebirugu n’obugale bwâwe. 25 Ohire enderho zâwe oku munzâni, ozigere, ohire omurhemere n’igufuli oku kanwa. 26 Omanye wakasârhalira ekanwa, olekigwa omu maboko g’okugungezize.