1 Okuhoza owinyu kuli kumufà lukogo, okumurhabâla kuli kushimba amarhegeko. 2 Kuli kwinjà okuhoza owinyu amango alagîrîre, ci kukwânîne okulyûla amango mwalagânîne. 3 Orhatwâga omu kanwa kâwe, onayumvanye n’abandi, n’amango wa­ lagîrira, wabona oburhabâle. 4 Banji bahoza bamanye mpu kubêrwa, bayumîrize balya babàhozagya. 5 Embere ly’okuhoza, kurhângishisha nyakuhôzibwa, kukunga obugale bwâge, olusiku lw’okulyûla lulegerere, lubè lwa mirongwè, oyumve mpu amango gali mabî! 6 Ka balyûla Nyakulyûza akabona ecihimbi c’ebyâge erhi abirîrwe. Akabà arhalyûzirwi, ebirugu bimuhere. kandi abè n’omushombanyi w’obumâma, oku alyûla ajâcira n’okutulagula, ebijâci gubè gwo munkwa bwo na bukenge. 7 Bantu banji --burhali bulonza bubî - balahira kuhoza, barhalonza ebyâbo bihere.

8 Obè wa lukogo oku b’obuligo, orhabayumukizagya aha mwâwe bali­nda oburhabâle. 9 Oshimbe irhegeko, orhabâle omukenyi; alagîrîre, orhamugalulaga maboko mûmu. 10 Ebirugu byâwe bije emwa mwene winyu n’omwîra, birhaboleraga e­ mwîna busha. 11 Okolêse obugale bwâwe nk’oku Nyamuzinda arhegesire, wâgala kulusha. 12 Okuhâna guli muhako gwâwe, gwakuciza amango g’obuhanya. 13 Okuhâna kwo kukulu aha mpenzi nzibu, ah’itumu lyôji, kwâkulwira e­mbêre z’omushombanyi.

14 Omuntu nkana anacihâne cikinja erhi wâbo orhuma, bulya okumulîkirira ziri nshonyi nkulu. 15 Orhayîbagiraga aminjà g’owakufungiraga, acîhâna yêne ahâli hâwe. 16 Omubî arhakengêra obwinjà bw’omufungizi, n’omugambanyi anayibagire omuciza. 17 Ecikinja cakenyize àbali bagale, cabahêka eyi n’eyi nka mulaba gw’omu nyanja. 18 Caluliza abantu banênênè, bahabukira omu bihugo, emahanga. 19 Omuminya anashwîre okucîhâna cikinja, mpu ly’ayunguka, n’obwo buhanya ashwirîre. 20 Orhabâle owinyu nk’oku onahashire, ci omanye nâwe wâhirima.

21 Akantu karhanzi k’okulama: mîshi, kalyo, mwambalo n’enyumpa y’okulâla. 22 Okubêra mukenyi aha mwâwe, omu nyumpa yâwe y’obukere, kwo kukulu aha kukâyigurhira omu nyumpa nyinjà ya bene. 23 Ogale erhi okene, osîme, orhacijiraga cigolo. 24 Kalamo kabî, okuhandûla ene n’irhondo, aha wankajà, ntà kubumbûla akanwa; 25 oli ho cigolo, n’enshonyi zâwe haguma, n’ebinwa bakubwîra, bya kanego: 26 «Bwîra oyo w’ekulî, ayishe arheganye amêza. arhujirîre ebi rhwâlya». 27 «Ewani sho! orhenge omwo, bulya mwâja owundi w’olukengwa: mwene wîrhu ambalamîre, mwo nanamuhandîsa omwo». 28 Nshonyi ezo muntu w’obukengêre okucinaguzibwa ntyo oku cihando, n’okulolwa nka muntu oli omu mwenda.