1 Okubula îrò buhirhi bukulêrha, kurhamya kunarhamya omubiri, entanya z’obuhirhi îrò zihiva. 2 Entanya z’omûshi zinarhume omuntu arhaja îrò, endwâla nkali enahanze îrò. 3 Omugale akola mpu ly’ebirugu byâge biluga, n’okurhamûka kwâge erhi kucîsîmîsa; 4 omukenyi akola mpu ly’abona eci alya, n’okurhamûka kwâge bushube buligo. 5 Osîma ensaranga arhafuma câha, ohubira obunguke bwo bunamuhubya. 6 Banji ensaranga zayîsire, lufù bàlimo, barhakabuzire bufà. 7 Gubà murhego oku bantu bazisîma, n’abahwinja boshi mo bahwêra. 8 Iragi lyâge omugale oyôsire buzira izâbyo, n’orhashimbûlula masholo. 9 Ye ndi oyo rhumusîme? Ajirîre olubaga aminjà garhankaderhwa. 10 Ndi wajire muli ebyo anarhengamwo mugumagumà? Ndi oyo wabula­ga bujira ecâha n’obwo ali akuhashire? Abula bujirira abandi amabî, n’obwo àkagajizire? 11 Obugale bwâge burhahuligane, n’endêko yâmanyisa aminjà àjizire.

12 K’amêza olikwo gahirhîre? Orhaderhaga n’okucîkunga, mpu: «Nêci, ene nayîgurha, byamâluga!» 13 Kengêra obubî bw’amasù g’obudambyè: ka hali eciremwa cibî kulusha isù? Erilakira obusha! 14 Orhalikiraga okuboko ah’okulalisire ayêrekîze okwâge, orhacîrhunikaga oku cîbo kuguma naye. 15 Manyira owinyu kuli we wêne, na muli byoshi obè murhimanya. 16 Olye nka mugula ehi bakuhîre, oleke okuvûkuza amarhama, n’okucîbonêsa nshonyi. 17 Obè we rhangireka okulya, bugula obwo, orhahubaga zakanaba nshonyi. 18 Akabà muli banji oku mêza, orhacîhâga embere z’abandi. 19 Hitya hiyîgusa omulume! erhi agwîshira, ayîse bwinjà. 20 Hunga bwinjà, ntalya-binene, omuntu asagizûka duba, anayumve irhwe liri lyangu. Enkananga, olushalo, okulumwa omu nda, lwo luhembo lw’omudambyè. 21 Kwankanabà wasêzîbwe okudambiha, yîmuka, ojè embuga, oshale, wayumva okola mwangu. 22 Nyumva, mwâna wâni, orhangayaga, buzinda lyo wayumva ebi nkubwîzire. Obè n’olugero omu ngasi mukolo wakola, wabona oku ntà mango endwâla yakuhikeko. 23 Omushamuka olalikîne akaluza ebiryo bwenêne asîmwa, bânajire nsiku baderha okuhâna kwâge. 24 Ci kwône olalikîne akabijinikira kushekerwa ashekerwa omu lugo, n’obujinisi bwâge kuderhwa buderhwa.

25 Orhabâga ntwâli y’amamvu, amamvu gahezize banji. 26 Eluganda, muliro barhangulamwo ecûma, ntyo kw’amamvu garhangula emirhima aha abalume banywera. 27 Amamvu ko kalamo k’omulume, casinga omuntu anywe galya g’olugero. 28 Bushagaluke bwa murhima, busîme bw’omuntu, go mamvu omuntu anywa ensa nyinjà, n’omu lugero lwinjà. 29 Kaheza, go mamvu omuntu anywa nk’ahagula, aganywere amîru n’omujina. 30 Endalwè enazûkize omuhwinja enongwe yamuheza, emuheze, emisî ­enyihe n’okulwa kuhajè, evune enjingo abulilêrha amalwa. 31 Muli oku mêza, orhasholoshonzagya owinyu, orhamushekeraga akaja­ mwo orukara, orhamubonêsagya nshonyi, orhanamujiraga burhè mpu akulyûlage.