1 Bakujizire mukulu w’amêza, orhajiraga bucîbone, obêre ekarhî k’abinyu nka muntu akâbo, obagabulire obulibwârhala nâwe. 2 Wamajira emikolo yâwe yoshi oku enali, bwârhalaga, nâwe osîme haguma n’abinyu, bakusîme, lwo luhembo lw’omukolo mwinjà wakozire. 3 We mushosi, derhaga, kuli kwinjà emund’oli, ci bunyi-bunyi, orhahulisagya enyimbo. 4 Amango bali bayumvîrhiza oluzihwa, orhaluzagya olubî, oleke okuhahabuka. 5 Amango bali oku mêza, olulanga abà namulîsa, kuli nka kula bayûshûla enjuma nyinjà-nyinjà oku magerha. 6 Cifungo ca hibuye hinjinjà omu burhunge bw’amasholo, lwo lulanga lw’omulya mwinjà amango banywa orhwamvu rhwinja. 7 Derhaga, nâwe musole, akabà kwa bulagîrire, akabiri karhali kanyi erhi bakakudôsa. 8 Oyôfihye ebinwa byâwe, oderhe binji omu bisungunu, obè wa kuhulika-kwa-muhya*32, 8 Kuhulika kwa muhya: omuntu anahulike n’obwo arhabuziri eci âderha; ci kwa burhimanya, kuyumvîrhiza ebi abandi baderha.. 9 Orhaderhezagya abakulu nka binyu mûmanîne mweshi, owundi muntu akaderha, oshube oku byâwe binwa. 10 Mukemezo gushokolera omukungulo, inêma lishokolera omuntu murhimanya. 11 Amango gâwe gamahika, gendaga, orhacilegerere, libirhira eka, oleke okûla kusharhira omu njira. 12 Aha ka, ocîmîmise, oshârhe, orhabîhaga omu kuderha buzira lugero. 13 Ovuge Lulema omunkwa kuli byoshi, ye kushobôza aminjà gâge.

14 Omuntu orhînya Nyamuzinda, ayumva akanwa kâge, abamulonza kurhona barhona emwâge. 15 Omuntu odôkereza irhegeko kuyîgusa limuyîgusa, ci endyâlya kusârhaza liyîsârhaza. 16 Abarhînya Nyamuzinda banajirwe bashinganyanya, ebijiro byâbo binjà kwo bimoleka nka kamole. 17 Omubî arhaziga bamuhanûla, arhabula igwârhiro ly’okujira obulonza bwâge. 18 Omuntu nkana arhagaya ihano, mubî-ogayana yêhe arhabà lugwêgwè. 19 Orhajiraga bici buzira kugerêreza, ntyo orhacîyunjuze kw’ebi wajizire. 20 Orhageraga omu njira y’ebikunguzo, orhagijà wasârhala. 21 Orhacîkubagiraga enjira ekubûsire, 22 n’abâna bâwe nabo arhacîkubagiragabo. 23 Ocîlange wêne muli byoshi, okwo nakwo kuli kushimba amarhegeko. 24 Omuntu ocîkubagire irhegeko, kushimba ashimba ebi lirhegesire, olangâlira Nyamuzinda arhabulabula.