1 Orhînya Nyamuzinda, obubî bunamugere kulî, ciru n’amarhangulo gâbwo anagafume. 2 Oshomba irhegeko arhali murhimanya, n’oli mpu alishimbire arhanalishimbiri kw’ali nka bwârho omu mulaba. 3 Omuntu w’obukengêre kucîkubagira acîkubagira irhegeko, oku bwâge likwânîne okuyemerwa nka mulêbi. 4 Ogerêreze eci waderha lyo bakuyumva, ocîjè emurhima embere oshuze. 5 Ebibà emurhima gw’ecinganyi kwo biyôrha nka mizizi ya ngâlè, obukengêre bwâge kwo buzunguluka nka masini 6 Enfarasi nto kw’eri nka mwîra olimbira amasheka, bakagerêreza mpu bayishonakwo, eyâne.

7 Cirhuma ensiku zirhayûmânana? N’obwo omwâka gwoshi, omûshi oku izûba gurhenga? 8 Kuli kuderha oku Nyamuzinda arhayûmanyanyagya ensiku: ye wajiraga ecanda n’empondo n’ensiku nkulu. 9 Akuza anayîmânika nguma-nguma, ezindi azijira nsiku kwône. 10 Abantu boshi barhenga omu budaka, Adamu budaka àlemagwamwo. 11 Nyamuzinda omu burhimanya bwâge ababerûla, abagerera ngasi muguma kwâge-kwâge. 12 Hali baguma agishire, abahira enyanya, abagoshôla, abahira hôfi naye, hali n’abà àkazire, àbarhanya, àbakaga aha bâli. 13 Kul’ibumba liyôrha omu nfune z’omubumbi, alibûmbe oku alonzize, kwo n’abantu bayôsire omu masù ga Lulema, ye bagabira n’obushinganyanya bwâge. 14 Obwinjà buyîmanzire omu masù g’obubî, n’obuzîne buyîmanzire omu masù g’olufù, ntyo n’omunya-byâha omu masù g’omuntu nkana. 15 Osingirize ebiremwa by’Ow’Enyanya byoshi, byoshi bigenda bibiri­ bibiri biyêrekerîne*33, 15 Biyêrekerîne: lolà 42, 24; Murh 3, 1-8.. 16 Niono, nie muzindiyisha, nayirîrwe, nâbà nk’omurhôlogozi wayisha enyuma z’âbasârûla. 17 Omugisho gwa Nyamuzinda gwanjira wa burhanzi, nka musârûzi, nabumba olurhanda. 18 Omanye kwône oku ntakoleraga bunguke bwâni bwône, ci n’obwa ba­lya boshi basîma okuyigîrira. 19 Munyumve, mweshi bakulu b’olubaga, mwe mukulîre endêko, murhege amarhwîri.

20 Aha mwâwe, mango ocizîne, orhalekaga mpu omwâna wâwe, mukà­ we, mwene winyu, omwîra wâwe akurhegeke. Orhahâga owundi ebirugu byâwe, kwanabà kucîyunjuza buzinda mango wabihûna. 21 Oku ocizîne onacidwîrhe wayîsa omûka, orhacîjiraga mujà wa ndi. 22 Okuhûnwa n’abâna bâwe, kwo kukulu aha kuyêrekera abâna ôburha wabahûna. 23 Ngasi kantu wajira koshi, oyôrhe we nnako, omanye wankacîshûbula oheze irenge lyâwe. 24 Amango wâbà wamâyunjuza ensiku z’akalamo kâwe, lwo lusiku lw’okufà, ogabe ebyâwe.

25 Ecihêsi ciri ca byahirwa, karhi na mizigo, omujà ali wa biryo, buhane†33, 25 Abajà: obukenge oku bajà, lolà Efz 6, 9; Kol 4, 1; Flm 16. na mukolo. 26 Okolêse omujà wâwe, wabona omurhûla, omuleke buzira mukolo, wabona oku naye alonza kurhi ankarhenga omu bujà. 27 Omurhamba n’olukoba, binagombye ecihêsi, obukali n’akarhi binatwe ifêka, ly’omushizi mubî. 28 Omuhè omukolo, akole, aleke okuyôloha, bulya kuyôloha kuyîgîriza amenge mabî. 29 Omuhè omukolo gumukwânîne, n’akakalahira, omuhogeke omugozi. 30 Ci oleke obukali bw’okumînya oku bantu, okulikire obushinganyanya. 31 K’ogwêrhe mujà muguma yêne? Omulole nka ye we, bulya wamulibukîre. 32 Ka mujà muguma yêne ogwêrhe? Omulole nka mwene winyu, bulya omulagîrirekwo. 33 Bulya okamukolêsa kubî, akuyâka, ngahi wacimurhangira?