36
Omusengero gw’okulîkûza n’okuyûbaka Israheli buhyâhya
1 Orhubabalire, Nyamwagirwa, Nyamuzinda w’igulu, lolà, ojugumye amashanja goshi.
2 Oshunge amashanja g’ihanga okuboko, gabone oku buhashe onajira.
3 Kulya wabayêrekaga oku oli Mwimâna, warhulibuza banasinza, kw’ojirage buno, nîrhu orhuyêreke obukulu bwâwe kuli bo.
4 Bakumanye nk’oku nîrhu rhwamanyaga oku ntà wundi Nyamuzinda kuleka We, Nyamwagirwa.
5 Oshubîrire okujira ebirhangâzo, ojire ebindi bisômerîne, oyêrekane obukulu bwâwe, okengêse okuboko kwâwe, okulyo kwâwe kuj’irenge.
6 Ozûse omungo, obulage omutula, oyîrhe omubisha, oherêrekeze omushombanyi.
7 Obiduhye ago mango, kengêra ecihango, ojire rhukuze ebijiro byâwe by’oburhwâli.
8 Omuliro gwâwe gw’olwihôlo gusingônole abasigîre, balya barhindibuza olubaga lwâwe baherêrekere.
9 Otuntume amarhwe ga balya bakulu b’ihanga, baderha, mpu: «Mâshi rhwêne!»
10 Oshubûze emilala ya Yakôbo yoshi, oyigalulire omwanya gwâyo nk’oku byàli burhanzi.
11 Nyakasane k’emirenge, babalira olubaga luderhwa izîno lyâwe: babalira Israheli, we wamujiraga nfula yâwe.
12 Olukogo lw’ecishagala câwe citagatîfu lukugwârhe, lukogo lwa Yeruzalemi, ho mwâwe orhamûkira.
13 Siyoni, omuyunjuze bukuze bwâwe, n’akarhwa-bwâmi kâwe okajire kayunjule irenge.
14 Oyîmangîre ebiremwa byâwe birhanzi: oyêrekane okuli kw’obulêbi bwajiragwa oku izîno lyâwe.
15 Orhimûle abakulangâlira, kubonekane oku abalêbi bâwe bo ba nyamuderha-kubà.
16 Nyakasane, oyumvîrhize omusengero gwa bambali bâwe, kulyâla kw’omugisho gwa Aroni oku lubaga lwâwe.
17 Boshi, en’igulu, bamanye oku we Nyakasane, Nyamuzinda w’ensiku n’amango.
Okuhugûkwa
18 Olurholero luyankirira ngasi kalyo luhâbirwe, ci hali ebiryo binjà kulusha ebindi. 19 Olulimi lumanyira ehisimbisimbi oku bwehe bwahyo, kwo n’okwo omurhima murhonde gurhahaba ebinwa by’obunywesi. 20 Omurhima mubî gunayîrhe mutula, ci omuntu wâbona kucîlanga acîlanga kuli gô.
Okulonza omukazi
21 Omukazi arhayîra mulume, ci abanyere babâmwo bamunyerenkana na bacinyere kwône. 22 Obwinjà bw’omukazi kusîmîsa busîmîsa amasù, kwo n’omurhima gw’omulume gulakira. 23 Omukazi ogwêrhe obwinja n’obutûdu ekanwa, ibà ali w’iragi ekarhî k’abandi. 24 Okuyanka omukazi gubà murhondêro gw’obuhirhi, ye murhabâzi oli akâge, nyamwegemerwa wâge. 25 Ishwa lirhajira côgo lirhahwa kuyônwa, buzira mukazi, omulume ye milumbo na muhabuka. 26 Kurhi wakacîkubagira cishambo-ali-magala. Orhali eyo arhali n’eno? 27 Ntyo kw’ali omulume orhajira aha abâ, olâla ah’obudufu bunamushimanyire.