1 Ngasi mwîra anaderhe: «Nâni ndi mwîra wâwe», ci hali omwîra w’izîno kwône. 2 Ka gurhali mutula munene oku muntu okubona owinyu erhi mwîra ahinduka mushombanyi? 3 Aye! murhima mubî, kurhi weki walemirwe, mpu ohire obuminya omw’igulu? 4 Winyu kwône ali mwîra amango ayôsire bwinjà, hano ensiku zicikwîhindulira, naye acîhindule. 5 Winyu kwône ali mwîra amango akulinzirekwo akantu, amango g’e­ntambala akutulikekwo amatumu. 6 Orhayîbagiraga omwîra w’okuli omu ntambala, omubîke emurhima omu bugale bwâwe.

7 Ngasi muhanûzi mahano abâna, ci hali abagahânira okulonza obunguke. 8 Omanye omuhanûzi, burhanzi cidôse bulagîrire buci bumugwêrhe - kwankanabà bunguke bwâge bwône alonza, - alekikuhirakwo akarhunzi. 9 Arhakubwîraga, erhi: «Njira nyinjà eyo olimo», abule na bwajà ebulâbi akabona oku byâbà. 10 Orhadôsagya ihano emw’orhakusîma, n’abayâgalwa nâwe orhaba­bwîraga emihigo yâwe. 11 Orhadôsagya omukazi ihano liyêrekîre mukîba, n’omwôba orhamudôsagya ihano ly’okulwa, n’omurhunzi orhamudôsagya ery’okurhimbûla, n’owagula orhamudôsagya ery’okuguza, n’omuyâgalwa orhamudôsagya ery’okuvuga omunkwa, n’omujinisi orhamudôsagya ery’okuhâna, n’omwôlo orhamudôsagya ery’okukola, n’omulimya orhamudôsagya ery’okuyûsa omukolo, omushizi mwôlo orhamudôsagya ery’omukolo muzibu; abo nt’ihano bankakuhà. 12 Ci ohûne ihano emw’omuntu orhînya Nyamuzinda, olya omanyire oku ashimba amarhegeko, olya omurhima guli nk’ogwâwe, olya wakufà lukogo erhi wankayâbirwa. 13 Buzinda, osêre oku ihano ly’omurhima gwâwe, bulya ntà mwîra okurhonya kugulusha. 14 Kanji kanji omurhima gw’omuntu gunamurhonde bwinjà, kulusha bajishamba nda bali oku ntondo. 15 Kulushîsa aho, oshenge Nyamuzinda: ayêrekeze amagulu gâwe omu njira y’okuli.

16 Omurhondêro gwa ngasi cijiro, bukengêre, gerêreza embere orhondêre omukolo. 17 Omuzî gw’enkengêro, murhima, gugwêrhe mashami anni: 18 aminjà n’amabî, obuzîne n’olufù, n’ensiku zoshi olulimi luyôsire lubiyimangire. 19 Wanabona ali mulenga w’okuyigîriza abandi, n’obwo kuli ye yêne ali wa busha; 20 lebè: w’akalimi, ye nyamakobwa, azinda erhi ishali lyamuyîrha, 21 bulya Nyakasane arhamurhonyizi, ntà burhimanya agwêrhe. 22 Lebè abà murhimanya omu nkengêro zâge yêne, n’omu iderha lyâge, obukengêre bwâge liri ishwa liyêra. 23 Omurhimanya w’okuli lubaga lwâge ayigîriza, n’emikolo y’obukengêre bwâge esêzire. 24 Omurhimanya abà ayunjwîre mugisho, abamubona boshi bamuderha w’iragi. 25 Ensiku z’akalamo k’omuntu ziri nganje, ci ez’Israheli zoki zirhankaganjwa. 26 Omurhimanya, ekarhî k’olubaga, ali mwîkubagirwa, izîno lyâge lya­ Nyamubâho ensiku n’amango.

27 Mwâna wâni, amango ocizîne, omanye obwôrhere bwâwe, hirharhujirîri, orhahihambiraga. 28 Bulya arhali ngasi kantu kakwânana hoshi arhali na ngasi muntu okômera byoshi. 29 Orhahubiraga ngasi hyanuna, oleke okuziga ebiryo, 30 bulya obudambyè buli bubî, nda-ya-byo arhahwa kulumwa omu nda. 31 Banji balire n’obudambyè, omuntu ocîlanga bwinjà anayûshûla akalamo kâge.