1 Kundi kundi ayôrha omuntu osêgeza omurhima n’enkengêro oku irhegeko ly’Ow’Enyanya. Kulongereza alongereza oburhimanya bw’abakulûkulu boshi, amango gâge g’okurhamûka, arhamûkire oku bulêbi. 2 Kubîka abîkirira emyanzi y’abantu bajire irenge, asheshere omu rhwonga-rhwonga rhw’emigani. 3 Analongereze okuhundûla omugani, ayumve iralà ly’amahwe g’emi­gâni. 4 Ekarhî k’abakulu yo akolera, wamushimâna haguma n’abarhegesi. Abalame, aj’ihanga, abwîne ebinja n’ebibî bibà omu bantu. 5 Kurhenga sêzi, n’omurhima gwoshi, emwa Nyamuzinda, Lulema wâge ayêrekera, ayînamulîre omurhima emw’Ow’Enyanya, arhenge omu kanwa, ashenge, ahûne obwonjo oku byâha byâge yêne. 6 Omukulu Nyamuzinda akalonza, amuyunjuza mûka gwa bukengêre. Naye yêne aderha ebinwa by’oburhimanya, ashenga avuge Nyamuzinda omunkwa. 7 Abona obumanye n’ihano lishingânîne n’amahwe mafulike agashwêkere oku murhima. 8 Ebi ayigîrizîbwe abiyêrekana, analimbire irhegeko ly’endagâno ya Nyamuzinda. 9 Banji bakûnga obukengêre bwâge, na ntà mango ayîbagirwe. Barhakahusa kumukengera, izîno lyâge lyâlama omu ngasi maburhwa. 10 Amashanja gâganira oburhimanya bwâge, n’endêko ekuze irenge lyâge. 11 Erhi akalama bwenêne, izîno lyâge lyaj’irenge kulusha ecihumbi, n’erhi akafà duba, gurhali muhona.

12 Nnonzire okushubiderha enkengêro zâni, omurhima gwâni guyunjwîre nka mwêzi mukulu. 13 Munyumve bâna bâni bakungwa, mukûle nka roza ntwêre oku cikunguzo c’olwîshi. 14 Murhengemwo akisûnunu kinjà nka nshangi, muyâse nka mburho, obwehe bwinyu buyûdûke, muyimbe olwimbo, mukuze Nyamuzinda oku mikolo yâge. 15 Mukuze izîno lyâge, muyâlîze irenge lyâge, muyimbe muzihe, muderhe mpu: 16 Nêci mushâna, erhahimwa kuyinjiha emikolo ya Nyamuzinda! oku adesire kwo binabâ. Ntà kuderha mpu: Byo bici ebyo? Cirhumire bibà ntyo? Ngasi kantu kayîgwa omu mango gâko. 17 Oluderho lwâge lwône lunasîke amîshi, lugasingike, izù lyâge linafukule amîshi, 18 oku adesire kunabè, ntâye wankacika ecijiro câge c’okuciza. 19 Ebi abantu bajira byoshi abimanyire, kurhankahashikana habè eci arhabona. 20 Kubona abona kurhenga ensiku n’amango, ntâco cimusômera. 21 Ntà kuderha mpu: Co cici eco? Cirhumire bibà ntyo? Ngasi kantu kagwêrhe eci kalemîrwe. 22 Kul’omugisho gwâge gwalumîraga byoshi nka lwîshi, gwajomya idaho nka nkuba y’ecihonzi, 23 kw’agabira amashanja obukunizi bwâge, ntyo kw’ahindulaga amîshi*39, 23 Agahindula munyu: lolà Murh 19, 24-26. munyu. 24 Oku enjira zâge zishinganyire oku bantu bamurhînya, kwo zinali za bikunguzo oku bantu babî. 25 Ebinja byalemîrwe abinja kurhenga emurhondêro, n’ebibî ababî. 26 Akantu karhanzi k’obulagîrire omu kalamo k’omuntu: mîshi, muliro, cûma c’omunyu, nshâno, marhà n’obûci, murhobo gw’oku muzâbîbu, mavurha n’omwambalo. 27 Ebyo byoshi bibà binjà oku binjà, ci oku babî, binahinduke bibî. 28 Hali empûsi balemeraga okuhâna, oku bukunizi bwâge ayijira buhanya. amango g’obuhane enayishe n’omuhûsi gwâyo, ejîre omukolo obukunizi bwa Lulema buyirhumire. 29 Omuliro, olubula, ecizombo n’olufù, ebyo byoshi byalemirwe okubà buhane. 30 Amîno g’ebiryanyi, endumira-mucira, enjoka engôrho y’olwihôlo lw’okuheza ababî, 31 byoshi ebà nganda yâge y’okujira oku adesire, biri en’igulu byalinga okurhumwa, hano amango gahika, birharhenguhe. 32 Co carhumaga nyanka omuhigo kurhenga emurhondêro, nagerêreza, nasiga amandiko nti: 33 «Emikolo ya Nyamuzinda yoshi ebà minjà aha nsâ ekwânîne, anashobôze olagîrîre. 34 Ntà kuderha mpu: ehi hirhali hinjà nka hira, bulya ngasi kantu kali kinjà omu mango gâko. 35 Bunôla, n’omurhima gwoshi muyashamage, muyimbe, mukuze izîno lya Nyamuzinda!»