1 Yoshiyahu okumukengêra kuli nka kujira envangè nyinjà y’obubâni kula omuvanzi w’amarâshi anajira; buli nka bûci bwo bununa omu ngasi kanwa, nka lulanga lwazihwa omu idinye. 2 Aj’aho, Yoshiyahu, akulikira enjira nyinjà, erya y’okugalula omurhima gw’olubaga, arhenza obugalugalu bulya bukakabulirwa; 3 omurhima gwâge aguyêrekeza Nyamuzinda, n’omu mango g’amabî, a­lwîsa anahimira obukunda-Lulema.

4 Kuleka ba Daudi, Hezekiyahu, na Yoshiyahu, abandi boshi baluza obugoma, bajahika irhegeko ly’Ow’Enyanya: abâmi b’e Yudeya bahwa. 5 Obuzibu bwâbo erhi babulekîre abandi, irenge lyâbo erhi balirekîre ecihugo c’emahanga. 6 Ecishagala citagatîfu cîshogwa, abashombanyi baciyôca, emihanda ya­co bayihambya, 7 Kulya Yeremiya anaderhaga. Bâli bamulibuzize n’obwo ali mulêbi mwîshogwa kurhenga omu nda ya nina, mpu akundule, ashâbe analambike, ci kwône kandi mpu ayûbake anarhwere*49, 7 Anarhwera: lolà Yer 1, 10. . 8 Ezekiyeli abonekerwa n’irenge, Nyamuzinda amuyerekalyo oku nyanya ly’engâlè ya Bakerubi†49, 8 Bakerubi: lolà Eze 1—3; 9—10.. 9 akengêra abashombanyi omu nkuba y’ecihonzi, mpu lyo ahimira abakulikira enjira nyinjà. 10 Balya balêbi ikumi na babiri nabo, amavuha gâbo gashabuke nka mburho omu nshinda zâbo, bulya barhûlirîze Yakôbo, bamuciza omu buyêmêre n’omu bulangâlire.

11 Kurhi rhwacitakirira Zorobabeli? Kw’ali nka kashè omu kuboko ku­lyo‡49, 11 Kulyo: okuboko kulyo habà hantu ha bukenge, muntu mukengwa bahira ekulyo.; 12 naye owâbo Yozwè, mwene Yosedeki, bombi, omu mango gâbo. bayûbaka aka-Nyamuzinda, bayabulira Nyamuzinda olubaga lutagatîfu, lubaga lubîkîrwe irenge ly’ensiku n’amango.

13 Nehemiya naye ali mukulu w’okukengêrwa, ye warhuzûkizagya enkûta zàli zamâhongoka, ajira enyumvi anazisimbanya, ayînamula eka.

14 Ntâye en’igulu walemirwe mpu ayumânane na Enoki; ye bàbalalanaga kurhenga igulu. 15 Ntâye kandi wabusirwe oli nka Yozefu, arhona emwa bakulu bâge, abà nyamwegemerwa w’olubaga lwâge, amavuha gâge gajirekwo omugisho. 16 Semu na Seti nabo bajire irenge omu bantu, ci kwône Adamu yenaciri enyanya lya ngasi ciremwa cizîne.