1 Oku handi Tobiya anacishuza îshe Tobiti, erhi: «Larha okuwantegesire koshi nakujira. 2 Ci konene kurhi nakahashamwo okubona oyo muntu? Arhanyishi, nâni ntamuyishi. Cimanyîso cici nankamuhâga lyo amanya, ananyêmêrere n’okumpà ezo nsaranga? N’enjira y’okujà eyo Mediya, ntayiyishi.» 3 Tobiti ashuza omugala Tobiya, erhi: «Ampîre ecimanyîso c’okwo rhwalagânanaga, nâni namuhà ecindi. Nacijira kabirhi na ngasi muguma ayanka cigabi ciguma, eco cigabi ciguma nacibîka n’ezo nsaranga. Lolaga oku ekola myâka makumi abirhi eno kurhenga mbîsize ezo nsaranga. Ci, mwâna wâni, okanyagye ojè walonza omuntu mwîkubagirwa mwankagenda naye, hano mugaluka, nanayîsh’imujuha; n’enyuma z’aho wanarhôla ezo nsaranga emwa Gabaeli». 4 Tobiya anacihuluka, ajà alonza omuntu omanyire enjira bankagenda naye e Mediya. Oku ahuluka, tundu kuli Malahika Rafaheli, ci arhali amanyire oku ali malahika wa Nyamuzinda. 5 Anacimudôsa, erhi: Yâga mwîra, oli wa ngahi? Naye, erhi: Ndi muguma w’omu bene Israheli, bene winyu: ndi kola eno munda. Anacimudôsa, erhi: «K’orhankamanya enjira ejà e Mediya obu?» 6 Naye, erhi: «Nêci, nanyije kanji kanji, mmanyire olw’enjira zâyo zoshi. Kanji kanji nankaja e Mediya, mpande n’aha mwa mwene wîrhu Gabayeli ôbà e Ragesi omu Mediya: Hali lugendo lwa nsiku ibirhi ngumagumà, kurhenga Ekbatani kujà e Ragesi, bulya kuli oku ntondo». 7 Anacimubwîra, erhi: Mwîra, nindaga, ntang’igend’ibwîra Larha, bulya ndi n’obulagîrire bw’okugenda nâwe, na hano rhugaluka nayîsh’ikulyûla. 8 Anacimushuza, erhi: Nalinda, ci konene orhalegemaga. 9 Tobiya anacikanya ajibwîra îshe, erhi: Lolà oku namâbona omuntu wa muli bene wîrhu, bene Israheli. Tobiti anacimubwîra, erhi: Kanya ompamagalire oyo muntu, lyo manya ali wa kuli bene ndi, ali wa mulala guhi n’erhi ali muntu wakucîkubagirwa, kandi erhi muntu mwankagenda naye. Tobiya anacihuluka, aj’ihamagala olya wâbo, anacimubwîra, erhi: Mwîra, larha akulonza. 10 Malahika anacijà omu nyumpa, Tobiti ye murhangiriza anacilamusa, owâbo anacimubwîra, erhi: Oshagaluke bwenêne. Tobiti ashubiriza, erhi: Bushagaluke buci nankacibona nâni. Niono nkola muntu orhacijira masù, ntacibona obulangashane bw’oku nkuba, cindwîrhe nagukuliza omu ndunduli y’omwizimya nka mifù erya erhacibona bulangashane. Nkola ncibêra omu karhî k’abafîre, nkola nkayumva abantu baderha ntanababone. Naye anacimushuza, erhi: Langâlira! osimike Nyamuzinda akola ahizire ensiku zâwe z’okufuma hôfi, olangâlire kône! Tobiti anacimubwîra, erhi: Mugala wâni Tobiya alonza okujà e Mediya: ka wankanahasha okujayo naye, omuluse? Nayîsh’ikujuha, mwene wîrhu. Naye anacishuza, erhi: Nêci nanahasha okugenda naye Manyire enjira zoshi na kanji kanji najîre e Mediya, nagezire omu rhubanda rhwayo rhwoshi, nasôka n’oku ntondo zâyo zoshi n’enjira zâyo nziyishi*5, 10 Ogu mulongo mulîmulî gurhenzire muli Bible de Jérusalem en ligne na Ebibliya Ntagatifu, Verbum Bible, Kinshasa 1992. 11 Tobiti anacimudôsa, erhi: Mwene wîrhu, oli w’omu mulala guhi n’obûko bwâwe muli baci? Ombwîre nâni, mwene wîrhu. 12 Naye anacimushuza, erhi: Bulagîrire buci oli n’obûko? Tobiti anacimushuza, erhi: Mwene wîrhu, nalonza okumanya oli mwene ndi n’izîno lyâwe we ndi. 13 Anacimushuza, erhi: Nie Azariyasi, mugala wa Ananiyasi mukulu, w’omu bene winyu. 14 Tobiti anacimushuza, erhi: Koko, mwene wîrhu; ndamusize, orhabêraga burhè mwene wîrhu bwenge nalonzagya okumanya eby’okuli n’omulala gwâwe. Kwamabonekanaga oku oli mwene wîrhu n’oku oli w’omu mulala mwinjà. Nayishigi Ananiyasi na Natani, bombi bene Semeliyasi mukulu nabo bakazâg’ijà e Yeruzalemu n’okuharâmya nâni, barhanahabukaga omu njira y’obuhwinja. Bene winyu bali bantu binjà bwenêne, oli w’oku cisiki cinjà. Nêci, kwokwo. 15 Anacimubwîra, erhi: Ngasi biyêrekîre omukamarho gwâwe, nakaz’ikuhà drakma nguma ngasi lusiku na ngasi bindi onalagîrîrekwo na mugala wâni. Genda na mugala wâni, 16 ciru nakuyushulira omukamarho gwâwe. Anacimushuza, erhi: Rhwagenda naye orhayôbohaga. Rhwagenda bwinjà, rhunagaluke hano mwâwe bagumagumà, bulya enjira eri nyinjà. 17 Tobiti anacishuza, erhi: Mugendage n’omugisho, mwene wîrhu. Anacihamagala omugala, amubwîra, erhi: Mwâna wâni, orheganye eby’amabalamo, ogende na mwene winyu. Nnâmahanga Nyamuzinda w’enyanya abalange eyo munda mwajà, anabagalule bagumagumà, na malahika wâge amuluse, anamulange mwâna wâni. Tobiya anacikomekera, bakolaga bagenda, barhang’ihôberana n’îshe na nina. Tobiti anacibwîra omugala, erhi: «Ogende bwinjà mwâna wâni». 18 Nina wa Tobiya anacimuhôbera, avugumula emirenge, anacibwîra Tobiti, erhi: «Cirhumire waleka oyu mwâna wâni agenda? K’arhali ye kola kakoma kîrhu, k’arhali ye okola wajà arhulangûla enjira? 19 Casinga lurhacibaga lwa nsaranga zône nânene, ci ziyôkole mugala wâni! 20 Okulama nk’okwo Nnâmahanga anarhuhâgaye kwàli kurhukwânîne.» 21 Tobiti anacimubwîra, erhi: Leka binwa bya bene ebyo! Omwâna wîrhu oyo ogenzire mugumagumà, kw’anagaluka rhugumagumà. N’amasù gâwe gabona amango agaluka mugumagumà. 22 Leka binwa bya bene ebyôla! Orhabayôboheraga, mwâli wîrhu. Malahika mwinjà amulusa n’okubalama kwâge kwabà kwinjà, agaluka mugumagumà.