1 Ana anacihusa okulaka.

2 Nyamwâna acilikûla bo na malahika, akabwa kâbo nako kabashimbûlira omu nyuma. Banahuma enjira yâbo oku bali babirhi. Oku budufu burhanzi hanacihanda oku burhambi bw’olwîshi luderhwa Tigri. 3 Nyamwâna anaciyandagala mpu akola agend’icîkalaba amagulu muli olwo lwîshi lwa Tigri. Ow’enfî munene anacishabira mulya mîshi, anaciyisha ayishire emunda ali alonzimulya okugulu. Nyamwâna anacibanda endûlù. 4 Malahika anacibwîra nyamwâna, erhi: «Ogwârhe eyo nfî, osêze». Olya mwâna anacirhuluba elya nfî, ayisha abululira ebulambo. 5 Malahika anacimubwîra, erhi: Oyibâge, orhôle endulwè, omurhima n’obudiku, obiyomeke ci okabulire amalà; endulwè, omurhima n’obudiku biri bufumu bwinjà. 6 N’erhi ayûs’ibâga erya nfî, nyamwâna ayiyômola endulwè, omurhima n’obudiku, ayôca ecihimbi câyo n’ecindi acishîgakwo omunyu, anaciyomeka omu nshoho. Oku bali babirhi banacilîkûla, kuhika bayegera e Mediya.

7 Okubundi nyamwâna anacidôsa malahika, erhi: «Mwene wîrhu Azariyasi, bufumu buci bubà omu murhima, omu budiku n’omu ndulwè y’enfî?» 8 Anacimushuza, erhi: «Omurhima n’obudiku bw’enfî orhang’ibisirha, onabibayize omulume nîsi erhi omukazi oli na shetani, kandi erhi wundi muzimu mubî, banafuma bulya buhanya bwâbo, balya bashombanyi bâbo banabarhengakwo loshi. 9 Endulwè, omuntu erhi ankayishîga oku masù g’omuntu walwâla amasù, nîsi erhi wankayibûhira oku masù gahûsire, galya masù ganafuma».

10 Erhi babà bamâjà omu Mediya, banakola bayegire hôfi na Ekbatani, 11 Rafaheli anacibwîra nyamwâna, erhi: Tobiya mwene wîrhu; naye erhi bici? Malahika, erhi: labaga omu mwa Ragweli rhugwâsirwe okuhanda mwa buno budufu. Oyo mulume ali mwene winyu, agwêrhe n’omunyere, izîno lyâge ye Sara. 12 Oyo mulume ali mwene winyu, agwêrhe n’omunyere, izîno lyâge ye Sara. Arhajira murhabana nîsi erhi wundi mwânanyere, ci Sara ho na hoshi aha. N’oyo munyere we omulingânîne kulusha abandi boshi, we okwânîne okumuhâbwa omuyîmemwo, ogwêrhe obuhashe bw’okuyîma omu by’îshe. Nyamunyere abà mwânanyere wa bwîrhonzi, mwânanyere wa burhwâli mwânanyere mwinjà bwenêne, n’îshe naye abà muntu mwinjà bwenêne.

13 Oli n’obuhashe bw’okumuyanka, onyumve mwene wîrhu, nayîsh’ishambâla n’îshe hano budufu, nti akuhè nyamunyere omushebe. N’amango rhwarhenga e Ragesi rhwanajira eby’obuhya bwâge. Manyire oku Ragweli arhankakuyîmaye nîsi erhi okumuhà owundi mpu abè ye omuyanka, bulya anahâbwa obuhane b’okufà nk’oku binayandisirwe omu citabu ca Mûsa, bulya amanyire oku we ogwêrhe obuhashe bw’okuyanka oyo mwâli kulusha abandi boshi. Mwene wîrhu onyumvagye buno, muli obûla budufu rhwashambâla ebiyêrekîre nyamunyere rhunamulunge mwembi n’amango rhwarhenga e Ragesi, rhwanamurhôla rhugende rhweshi emwinyu.

14 Okundi Tobiya anacishuza Rafaheli, erhi: «Yâga mwene wîrhu Azariasi, nayumvîrhe oku oyo munyere amayankwa na balume nda n’oku banakâfîra omu k’obuhya budufu, ngasi mango erhi banarhangulaga okumuyegera, boshi banafè nanayumvîrhe baderha mpu muzimu okaz’ibayîrha. 15 Nâwe wêne oyumvîrhage oku arhali nyamukazi ye ofà ci abamuyegera bo bafà; niono nyôbohire okufà, bwenêne obu ndi mwâna cûsha wa larha na nyâmà; erhi na nkafà barhacigwêrhi wundi ndi wankababisha.»

16 Anacimushuza, erhi: Ka orhacikengiri galya marhegeko sho akuhaga mpu oyanke omukazi w’omu nyumpa y’îshe? Ci onyumvagye mwene wîrhu, orhalolaga kw’oyo muzimu, oyanke nyamunyere kône; niono manyire oku muli buno budufu bakuhaye mpu abè mukâwe*6, 16 Amahugûlo g’e cilatini gayushwire ebinwa malahika Rafaheli abwîraga Tobiya, erhi: «Oyumvîrhize bwinjà nakubwîra bantu bahi bayish’ihimwa na Shetani. Bo balya: erhi babà bamayankana, omurhima gwâbo gwanaciyegûla bwenêne kuli Nyamuzinda, lyo bahima amagene gâbo, ciru na buzinda bashushane n’enfarasi erhi cihêsi nkw’oku obukengêre bwâbo bwanazazisire, ntyo bo bantu Shetani ahashire abo. Wêhe, hano oyûs’ijà omu buhya, obêre nsiku isharhu mwene mukâwe, erhi mudwîrhe mwasalira buzira kumanyana, omu lusiku lurhanzi, omugî gw’enfî gwanalibirhakwo oyo muzimu (Asimodeya:). Olusiku lwa kabirhi, wanayêmêrerwa omu cinyabuguma ca bashakulûza hatagatîfu. Omu lusiku lwa kasharhu, wanahâbwa obwangà lyo mukaz’iburha abâna bagumagumà. Enyuma ly’olwo lusiku lwa kasharhu, akabà ogwêrhe obukenge n’omurhima gwâwe kuli Nyamuzinda, go mango wankayegera mukâwe. Arhali mpu lyo otwa amagene gône, ci bwenêne omu kulonza okuburha abâna. Na ntyo gulya mugisho gw’okuburha washobôlaga emwa Abrahamu, wanaguhereza iburha lyâwe».. 17 Hano okola wajà omu kabuhya orhang’irhôla kuli bulya budiku na kuli gulya murhima gw’erya nfî, obisirhire halya bayôkera obukù: ehisununu hyanazûka, hihimve shetani 18 shetani anahibayizako kandi anayâka arhenge muli nyamukazi loshi. Na hanôla mukola muli haguma, burhanzi mwanarhang’iyîmuka, mwanafukama, musalîre, mushenge Nnâmahanga w’e mpingu amuyandagalizekwo obwonjo n’obucire bwâge. Orhayôbohaga, bulya kurhenga mîra oyo mukazi we alirheganyizibwe mpu abè kashambala kâwe, mpu nâwe obè bucire bwâge. Mwayîsh’igenda mweshi naye; nanakubwîra oku wamuburhakwo abâna, nabo bayôrha nka balumuna bâwe. Orhayôbohaga. 19 Erhi Tobiya ayumva ebyo binwa bya Rafaheli byamumanyisagya bwinjà oku agwêrhe omunyere w’omu mulala gwâge, n’oku ali w’omu bûko bw’îshe, anacimusîma bwenêne, n’omurhima gwâge gwacishwekera kuli ye.