1 Erhi bayûsa okulya n’okunywa, balonza okuj’igwîshira, Bahêka nyamwânarhabana, bamuhira omu yâge nyumpa. 2 Tobiya anakengêra birya binwa bya Rafaheli: anayômola omu nshoho yâge bulya budiku na gulya murhima gw’enfî, anabisirhirira aha lukalango lw’obukù. 3 Akabayo k’erya nfî kacîka olya shetani, ayâka, ajà omu bihugo by’e Mîsiri y’enyanya. Rafaheli anacimukulikirayo agend’imushwêkerayo. 4 Banacihuluka banaciyigala enyumpa. Tobiya anacizûka oku ncingo anacibwîra Sara, erhi: «Mwâli wîrhu, zûka rhushenge rhuhûne Nnâmahanga arhubabalire anarhulange». 5 Anacizûka, barhondêra okushenga n’okuhûna mpu babone akalamo bakaderha mpu: «Oj’irenge, Nyamuzinda w’ababusi bîrhu n’izîno lyâwe lij’irenge emyâka yoshi omu ngasi bûko. Amalunga gakukuze, n’ebiremwa byâwe emyâka n’emyâka! 6 “We walemaga Adamu, wanacimuhà owakâmurhabâla anakâmugwâsa, ye mukâge Eva na bombi bo babusire abantu boshi. Wadesire erhi kurhakwânîni omuntu ayôrhe yêne, rhumuhè owakâmurhabâla omushushire”. 7 “Na bunôla Yâgirwa, arhali mîru garhuma nayanka oyu mwâli wîrhu, ci omu kushimba okunali. Ojire rhubone obwonjo nie naye, rhulinde rhushosihalira haguma”». 8 Bombi oku bali babirhi banacishuza, mpu: «Amen, amen». 9 Banacijà îrò obwo budufu.

10 Ragweli anacizûka, anacihamagala abambali, bakanya bagend’ihumba enshinda. Erhi amâderha, mpu: «Arhag’ifà n’abandi balekirhushekera n’okurhujâcira». 11 Erhi babà bamâhumba omwîna, Ragweli akanya ajà ebwa nyumpa, aha magala mukâge, anacimubwîra, erhi: 12 «Orhume mwambali-kazi muguma ajemwo, alole erhi acizîne, lyo erhi akabà anafîre rhuhash’imubisha n’abandi barhamanyiri». 13 Banacirhuma olya mwambali-kazi wâbo, anaciyasa omuliro. anaciyigula olumvi: anacijà omu nyumpa, ashimâna bali îrò banagwîshîre haguma. 14 Olya mwambali-kazi wâbo anacihuluka, ababwîra, erhi: azîne na ntà hibî hirimwo. 15 Ragweli akuza Nyamuzinda w’empingu anaciderha, mpu: «Oyagirwe, Nyakasane na ngasi bukuze bwimâna, oyagirwe emyâka yoshi! 16 Oyagirwe, bulya wamansîmîsa, arhali oku nakâg’icikêbwa kwo kuciyîshire, ci wamarhujirira nk’oku obwonjo bwâwe bunali bunene. 17 Oyagirwe, bulya wababalire abà bâna b’ecûsha bombi. Obashobôze, Nyakasane obwonjo n’obucire n’akalamo kâbo kayûrhire omu busîme n’obwonjo bwâwe». 18 Okubundi anacibwîra abarhumisi mpu batulire omwîna burhacicanûla.

19 Anacibwîra mukâge mpu ajire migati minji, naye akanya ajà ebwa lugo lw’ebintu byâge ayisha adwîrheyo mpanzi ibirhi, ngandabuzi ini, anaciderha mpu babirheganye, nabo banarhondêra okubirheganya.

20 Anacihamagala Tobiya anacimubwîra erhi: «Nsiku ikumi n’ini zoshi orhafukunya hano, ci wabêraho omu kulya, omu kunywa na ntyo osîmîse omurhima gwa mwâli wâni owali wamârhindibuka n’amalumwa. 21 Omu bintu byâni byoshi, orhôlemwo bwona buno, ecigabi ca kabirhi*8, 21 Emyanzi eyêrekîre obuhya bwa Sara, eshushîne n’emyanzi y’obuhya bwa Rebeka (Murh 24), Raheli (Murh 29); mukà Samsoni (Bac 14). Cikône lêro ahâli h’okuhûna engulo (Murh 34, 12) îshe wa nyamunyere anabà ye sholôla engulo., kandi ogende mugumagumà emunda sho ali. N’ecindi cigabi cisigîre, mango nafà niono rhwêne mukânie, canabà câwe. Olangâlire! Mwâna wâni, ndi sho, na Edna ali nyoko, rhuli eburhambi bwâwe n’ebwa mwâli winyu buno n’emyâka yoshi. Olangâlire, mwâna wâni!»