1 Okubundi Tobiya anacibwîra Rafaheli erhi: 2 «Mwene wîrhu, Azariyasi, yanka barhumisi babirhi na ngamiya ibirhi ojè e Ragesi y’omu Madiya emwa Gabayeli okumpûnira ensaranga anayishe emwâni oku buhya. 3 Ojè emwa Gabayeli: omuhè eri ikontorà. Orhôle zirya nsaranga, onamubwîre ayîshe eno oku buhya. 4 Bulya wêne omanyire oku larha adwîrhe aganja ensiku, n’erhi nankalegama lundi lusiku luguma nanamubabaza bwenêne. 5 Wabwîne kurhi Ragweli anahigaga, nâni ntankahama akanwa kâge». Rafaheli anacilîkûla na ba lya barhumisi bâni na zirya ngamiya oku ziri ibirhi, bajà e Ragesi omu Mediya. Bahika aha mwa Gabaeli. Anacimuhà lirya ikontorà anacimubwîra oku Tobiya mugala wa Tobiti anayansire omukazi n’oku amulalisire mpu ajè oku buhya. Anaciyimuka, amuganjira orhushoho nk’oku rhwalikwo akashè, barhuhira oku ngamiya. 6 Banacizûka lubungubungu bombi, bajà oku buhya. Banacijà aha mwa Ragweli, banacishimâna Tobiya alilambulire oku cîbo; ahama, amulamusa, Gabaeli avugumula emirenge, anacimubwîra, erhi: «Muntu w’okunali, waburhagwa n’omuntu w’okunali, muntu mushinganyanya, muntu wa marhabâle manji, Nyakasane amuyandagalize omugisho gwâge gw’empingu, we na mukwî, îshe na nina wa mukâwe! Ayâgirwe Nyamuzinda ocirhumire nalolakwo enshusho menemene ya muzâla wâni Tobiti!»