1 Muli ago mango, Tobiti, ngasi lusiku erhi anaganja emiregerege, inga omu kugenda inga omu kugaluka. Ezo nsiku zahika n’omugala arhagaluka. 2 Lêro akâcîderheza, erhi: «Ka kugwârha bamugwârhirage eyo munda? Nîsi Gabaeli ka kufà afirage, na ntyo abula wamuhà zirya nsaranga». 3 Arhangira okuyumva omungo. 4 Mukâge Ana anacimubwîra, erhi: «Mugala wâni kufà oku afîre arhaciri w’omu bazîne». Anacirhondêra avugumula emirenge, akâlakira omwâna wâge, akâderha, erhi: 5 «Yajeewe, mwâna wâni, carhumaga nkuleka nti ogende, we kamole k’amasù gâni». 6 Tobiti anacikamukalihira, e erhi: «Hulika! leka binwa bya bene ebyo, mwâli wîrhu! Ali mugumagumà. Hanali cindi cabahanzize okuyisha; omuntu wagendaga naye ali muntu wa kucîkubagirwa, anali w’omu bene wîrhu. Orhacîlibuze erhi ye orhuma, mwâli wîrhu: ci ye alà». 7 Nyamukazi anacimushuza erhi: Orhakambwîra ntyo, orhanshundule, omwâna wâni afîre. Nyamukazi anacicîkwêba embuga, ahengûza muli erya njira omugala agendamwo na ntyo ngasi lusiku; na ntâye wankahashire okumurhûliriza. Erhi izûba lyazikaga, naye anashubire omu nyumpa, abugumule emirenge, alake obudufu boshi buzira kubona îrò.

Erhi zirya nsiku ikumi n’ini Ragweli ahigaga mpu ajiriramwo omwâli olusiku lukulu zihika, Tobiya anacijà emunda ali anacimubwîra, erhi: «Waliha nsengarusirage, nkola nagenda, bulya manyire oku larha na nyâmà bakola bamanya mpu barhakacimbonakwo. Nkusengîre larha ondikulage njè emunda larha ali. Nakumanyisize bwôrhere buci namulesiremwo». 8 Ragweli anacibwîra Tobiya, erhi: «Bêra aho, bêra aho, mwâna wâni, narhuma entumwa emunda sho Tobiti ali, banaj’imumanyîsa emyanzi yâwe». 9 Tobiya azikira bwenêne, erhi: «Nanga ciru n’ehitya, ondikulage duba njè emunda larha ali». 10 Ragweli anaciyimuka, anacihà Tobiya omukazi wâge Sara, na ecigabi ca kabirhi c’ebintu byâge. Abambali, abambali-kazi, enkafu, ebibuzi n’endogomi, engamiya, emishangi, ensaranga n’ebirugu by’omu nyumpa.

11 Anacibasezera, bagenda boshi bashagalusire; anacibabwîra Tobiya, erhi: «Oyôrhe bwinjà, ogende bwinjà, mwâna wâni! Nyamuzinda w’empingu akushokolere we na mukâwe Sara, mâshi nâni nsinze oku bâna binyu embere nfè». 12 Anacibwîra omwâli Sara, erhi: «Ojage emunda shazâla wâwe ali, bulya kurhenga ene bakola babusi bâwe nk’abanakuburhaga bônene. Ogende n’omurhûla, mwâli wâni, nkaz’iyôrha nayumva aminjà kuli we amango nancibâmwo omûka goshi». Erhi ayûs’ibalamusa, abasêzera.

Edna naye anacibwîra Tobiya, erhi: «Mwâna na mwene wîrhu muzigirwa, Nyakasane akuhêke, mâshi nâni mbone bagala bâwe na ba mwâli wâni Sara e mbêre nfè. Embere za Nyakasane nkuhîre oyu mwâli wâni, irhondo orhamubabazagya ciru n’eriguma omu kalamo kâge koshi. Mwâna wâni, ogende n’omurhûla! Kurhenga ene nkola ndi nyoko, na Sara mwâli winyu. Mâshi nîrhu rhubone eryo iragi omu nsiku zoshi n’obuzîne bwîrhu». Anacibanunugurha bombi, anacibasêzera mpu bagende n’omurhûla.

13 Tobiya anacirhenga aha mwa Ragweli yêshi ali mutaraga, anashagalusire, ayisha akuza Nyakasane w’empingu, ye mwâmi w’ebintu byoshi, kuli okwo anagendesize amâjira gâge goshi. Agisha Ragweli na mukâge Edna anaciderha, erhi: «mbè n’iragi ly’okukaz’ibakenga n’okubakuza omu nsiku z’akalamo kâni koshi!»