1 Erhi bahika aha Kaserini oli ah’ishiriza lya Ninive, Rafaheli anaciderha, erhi: 2 «Omanyire kurhi rhwasizire sho ayôsire. 3 Rhukola rhwalibirha, rhushokolere mukâwe, rhugend’irheganya enyumpa ayish’ijamwo.» 4 Banacishokola oku bali babirhi. Anacimubwîra erhi: «Fumbarha erya ndulwè omu maboko gâwe». Akabwa nako kanacigenda nabo, kashokolera Rafaheli na Tobiya.

5 Ana ali atamîre erhi adwîrhe ahengûza omu njira y’omugala. 6 Anacilangîra ayishire, anacibwîra îshe, erhi: «Alà, mugala wâwe alà oyishire n’olya mulume banagendaga bombi». 7 Rafaheli anacibwîra Tobiya embere bahike hali îshe, erhi: «Manyire oku amasù gâge gayiguka. 8 Oyîsh’ishîga amasù gâge n’erya ndulwè y’enfî, obufumu bwanagwârha, kandi bwanajà bwarhenza galya magamba g’amadôka, n’aho sho anashub’ibona naye obulangashane».

9 Ana alibirha, acîhonda omw’igosi ly’omugala, anacimubwîra, erhi: «Obu namâkubona, mwâna wâni, nanacîfiraga». Anacivugumula emirenge. 10 Tobiti naye anaciyimuka, ajà ahukuza eyi n’eyi ayisha omu muhango gujire omungo. 11 Tobiya anacijà emunda ali n’erya ndulwè y’enfî omu nfune; ayibûhira oku masù gâge, amugwârha, anacimubwîra, erhi: «Olangâlîre, larha!» amuhirako obufumu, analinda hisanzi hisungunu, 12 buzinda, na ngasi kuboko, amudokôla ehishisha oku burhambi bw’amasù. 13 Îshe acîyôha omw’igosi lyâge, 14 avugumula emirenge, anaciderha, erhi: «Nakubwîne, mwâna wâni, kamole k’amasù gâni!» Anaciderha, erhi: «Ayâgirwe Nyamuzinda, liyagirwe n’izîno lyâge likulu bwenêne, bayagirwe na bamalahika bâge batagatîfu boshi. Izîno lyâge likaz’iyôrha libaho, bayagirwe na bamalahika bâge emyâka yoshi! 15 Bulya yêne alirhanzirimpa obuhane na lolà oku niono ndwîrhe nabona buno mugala wâni Tobiya».

Tobiya anacijà omu nyumpa, ayishakuza Nnâmahanga n’izù linene; anacimanyîsa îshe oku okubalama kwâge koshi kwagendesire bwinjà, oku adwîrhe ensaranga, oku anashebire n’omukazi Sara mwâli wa Ragweli, erhi: «Lolà oku ali hôfi n’omuhango gw’e Ninive».

16 Tobiti anacikanya aj’iyankirira omwâlikazi, yêshi n’omwîshingo, anayisha akuza Nnâmahanga kuhika aha muhango gwa Ninive. N’abantu b’e Ninive balangiraga ajà akanyagira n’emisî yâge yoshi, lêro barhanacimugwârhiri oku kuboko, basômerwa. Na Tobiya ajà ahamagaza oku Nyamuzinda anamuberire obwonjo anamuyigwîre amasù.

17 Tobiti anaciyegera hôfi na Sara, mukà omugala Tobiya, anacimubwîra, e erhi: «Oyîshe mugumagumà wêshi mwâli wâni. Ayâgirwe na Nyamuzinda owakuhisagya eno mwîrhu, mwâli wâni. Sho agishwe na mugala wâni Tobiya agishwe, nâwe wêne ogishwe mwâli wâni! J’omu mwâwe, ozibuhire, oli n’omugisho n’obusîme, mwâli wâni». Olwo lusiku Abayahudi boshi b’e Ninive basîma. 18 Nabo banaciyisha Ahikari na Nadani, bagala ba mukulu wa Tobiti, nabo bashagaluka kuli okwo.