1 Erhi ensiku nkulu z’obuhya zihwa, Tobiti anacihamagala omugala Tobiya anacimubwîra, erhi: «Mwâna wâni, lolà kurhi wahà oyo muntu omukamarho gwâge na kurhi wankamuyûshûlira». 2 Tobiya anacishuza, erhi: «Larha, mukamarho muci nankamuhà? Ntankaheza bici erhi nakamuha ecigabi ca kabirhi c’ebirugu anadwîrhe rhwe naye. 3 Anangendîne mugumagumà, anabusire mukânie, anandwîrhîre ensaranga, amânakubuka, luhembo luci nankamuhâga?». 4 Tobiti anacishuza, erhi: «Nêci kukwânîne ayanke ecigabi ca kabirhi c’ebi birugu anayishaga adwîrhe». 5 Tobiya anacimuhamagala owâbo amubwîra, erhi: «Yankaga ecigabi ca kabirhi c’ebi wali odwîrhe, gwo mukamarho gwâwe, onagendage n’omurhûla».

6 Okubundi Rafaheli anacibahêka mahwe oku bali babirhi anacibabwîra, erhi: «Mukuze Nyamuzinda mumuhêke irenge embere z’ebiremwa binabamwo omûka byoshi oku minjà anamujirire, omu kukaz’ikuza n’okuyimba izîno lyâge. Mumanyîse abantu boshi ebi Nyamuzinda amujirîre, murhanarhindiraga okukâmuvuga omunkwa. 7 Kuli kwinjà okulanga ihwe lya Mwâmi, ci konene kuli kwinjà okumanyîsa n’okuyâlîza aminjà ga Nyamuzinda*12, 7 Abagula b’abâmi barhegesirwe okulanga amahwe ga bannâhamwâbo lyo amahano gâbo garhag’ihagalikwa n’ababisha. Ci kône okumanyîsa obuzigire bwa Nnâmahanga kôhe, kurhankalêrha mbaka nci. Ci kuli kuhamîriza obwonjo n’okuli obuhashe n’obuzigire bwa Nnâmahanga.. Mukajira aminjà, ntà bubî bwankamujakwo. 8 Okushenga, omu kucîshalisa okunali, n’okukâjira amarhabâle omu bushinganyanya, ebyo bilushire obugale burhalimwo bushinganyanya. Kuli kwinjà kulusha okukahâna oburhabâle ahâli h’okubîka obuhirhi bw’amasholo. 9 Amarhabâle ganafungire omuntu oku lufù, ganamukulire n’ebyâha. Banyakujira marhabâle, ensiku zâbo zayunjula kalamo. 10 Abajira ecâha n’okurhashingânîni bali bantu bacîshomba bônene. 11 Nababwîra okunali koshi, ntabafulike ciru n’ehitya. Narhanzir’ibabwîra nti kuli kwinjà okubîka ihwe lya mwâmi n’okumanyîsa n’okuyâlîza n’obukuze boshi emikolo ya Nyamuzinda. 12 Alà oku galya mango wakazâg’isalîra we mâshi na Sara, nâni nakaz’ikengêza ebyo by’amasala gâwe emwa Nyakasane, kuguma n’amango wakazâg’ibisha emifù. 13 Mwa galya mango orhakazâg’irhindira okuzûka, okuleka ebiryo byâwe n’okugenda n’okuj’ibisha omufù, narhumwa emunda oli mpu nkurhangule. 14 Ci, kuguma Nyamuzinda anantumire mpu nkufumye na mwâlikazi wâwe Sara. 15 Niono nie Rafaheli muguma w’omu bamalahika nda, balya bakagenda n’okujà embere z’irenge lya Nyakasane».

16 Ba-Tobiya oku bali babirhi barhemuka, bakumba bubî, bayôboha bwenêne. 17 Anacibashuza, erhi: «Murhayôbôhe, omurhûla kuli mwe! Mukuze Nyamuzinda ensiku zoshi. 18 Niono amango nali haguma ninyu, arhali buhashe bwâni bwarhumaga nabêra haguma ninyu, ci oku bulonza bwa Nyamuzinda. Mumukuze ensiku zoshi, munayimbe irenge lyâge. 19 Orhakazâg’imbona nalya, ci wakarhangâla n’ebiri nka bilôrho. 20 Na buno mukuze Nyakasane o mw’igulu lyoshi, munakavuga Nyamuzinda omunkwa. Loli oku nkola nasôkera emw’olya wantumaga. Muyandike ebyo byanamuberire byoshi». 21 Anacisôka, nabo bazûka, ci konene barhacihashaga okumubona. Bakakuza, bakayîmba irenge lya Nyamuzinda, banamuvuga omunkwa kuli ago minjà anabajiriraga, na kuli okwo babonekeragwa na malahika wa Nyamuzinda.