«Ayâgirwe Nyamuzinda ozîne ensiku zoshi n’obwâmi bwâge bugandâze ensiku zoshi!

2 Bulya anahane, anabulibabalira. Anahebe omuntu idako bwenêne, ekuzimu; abuli muyôkola na ntâco cankacîfulika okuboko kwâge.

3 Mumuvuge omunkwa mweshi bene Israheli, embere z’amashanja oku amuhiraga muli bo.

4 Muli bo abamanyisize obuhashe bwâge. Mumuhêke irenge embere z’ebiremwa byoshi, bulya ye Nyakasane na Nyamuzinda wîrhu; ye Larha, ye Nyamuzinda emyâka n’emyâka.

5 Anabahane erhi mabî ginyu garhuma; na mweshi ashub’ibabalira omu gandi mashanja goshi, emunda mwanashandabanire.

6 Mukashubira emunda ali n’omurhima gwinyu goshi n’iroho linyu lyoshi, omu kukâjira okunali embere zâge, ashub’iyêrekera emunda muli, arhanacibafulike obusù bwâge. Mulolage ebi akozire muli mwe, munamukuze n’emisî yinyu yoshi; mukuze Nyakasane w’obushinganyanya, mukuze omwâmi w’e myâka yoshi. Niono eno munda nahêkagwa bujà, ntahusa kumukuza, na nyêrekane abuhashe bwâge n’obukulu bwâge embere z’amashanja g’abanya-byâha. Abanya-byâha, galuki omu bushinganyanya. Ndi wa nkamanya, hali amango ankabarhonya anababalire.

7 Nakuza Nyakasane mushinganyanya, n’omurhima gwâni gwakuza Omwâmi w’empingu n’enshagali gwanashagaluka.

8 Boshi bakamukuza n’okumuhêra irenge lyâge aha Yeruzalemu. 9 Yeruzalemu, cishagala citagatîfu, Nyamuzinda akuhana erhi bijiro bibî by’abâna bâwe birhuma, ci konene ashub’ibabalira abâna b’abashinganyanya.

10 Ovuge Nyakasane omunkwa bwenêne, onakuze Nyakasane w’enyanya emyâka n’emyâka, lyo aka-Nyamuzinda kâge kayûbakwa muli we n’obusîme bunene. Lyo asîmîsa muli we balya bahêkagwa bujà, anayêrekanîre muli we obuzigire bwâge bw’ensiku n’amango oku balagîrîre.

11 Obulangashane bwayisha bwalaza, bwamolekera empande z’igulu zoshi. Amashanja manji gakarhenga kuli gajè emunda oli, n’abantu b’e mpande zoshi z’igulu bashagamukira ebw’izîno lyâwe litagatîfu, bakayisha badwîrhe entûlo zâbo omu maboko gâbo, bazidwîrhîre Omwâmi w’empingu. Obûko bwa ngasi lubero bwakuza izîno lyâwe we cishagala cîshogwa emyâka n’emyâka.

12 Abakuhinde bakahindwa, bakahera abalonzikuheza, bahenangula enkûta zâwe, eminâra yâwe, banayôca enyumpa zâwe. C’abakurhînya bagishwe ensiku zoshi.

13 Okanyagye, oshagaluke mweshi n’abâna b’abashinganyanya, bulya boshi bashûbûkira haguma. Bakuze Nyakasane w’emyâka n’emyâka.

14 Iragi lyâbo abakusîma, abasîma n’omurhûla gwâwe! Iragi lyâbo abantu bankababala n’amalibûko gâwe, bulya muli we bayish’ishagaluka, banabone obushagaluke bw’ensiku n’amango.

15 Iroho lyâni likuzize Nyakasane, ye Mwâmi mukulu.

16 Bulya Yeruzalemu anâciyûbakwe, lwo lugo lubamwo enyumpa yâge emyâka n’emyâka. Lyanabà iragi lyâni erhi omu misigala y’obûko bwâni, nankacibona irenge lyâwe n’okukuza Omwâmi w’empingu! Emihango ya Yeruzalemu yanacishub’iyûbakwa n’enshangabuye, na ngasi gandi mabuye ga ngulo ndârhi. Eminâra ya Yeruzalemu yayîsh’iyûbakwa n’amasholo n’orhucîkirizo rhwayo rhuli embere rhwanayûbakwe n’amasholo gône gône.

17 Emirimbwa ya Yeruzalemu yabambwamwo amabuye minjà ga ngasi lubero. Enyumvi za Yeruzalemu zanayimba enyimbo z’obushagaluke n’abantu b’omu Yeruzalemu banaderhe mpu Aleluya! Aganze Nyamuzinda w’Israheli; n’abagishe bayish’ikuza izîno litagatîfu emyâka n’emyâka!»