1 «Nyamuzinda wa balarha, Nyakasane w’olukogo, we walemaga igulu n’oluderho lwâwe, 2 “we wabumbaga omuntu n’oburhimanya bwâwe, mpu abè murhambo w’ebiremwa birhenga omu nfune zâwe”, 3 “mpu arhegeke igulu omu butagatîfu n’omu bushinganyanya, mpu akaz’itwa emmanja n’omurhima gushingânîne”, 4 “onshobôze nâni oburhimanya bukwânîne entebe yâwe orhanankagaga omu bâna bâwe”. 5 “Bulyâla ndi mwambali-kazi wâwe, nnandi mugala wa mwambali-kazi wâwe, muntu muzamba na wa nsiku nyofi, nnandi munyi w’okuyumva oburhimanya n’amarhegeko”; 6 “bulyâla omuntu ciru ankabà mwimâna omu karhî k’ababusirwe n’abantu, nk’arhagwêrhi oburhimanya burhenga emwâwe, kwo banamulola nka busha”. 7 “Wacinyishozire mpu nyimangire olubaga lwâwe, mpu ntegeke bagala bâwe na bali bâwe”. 8 “Wantegesire mpu nkuyûbakire aka-Nyamuzinda oku ntondo yâwe ntagatîfu, n’oluhêrero mw’olu lugo wagwisiremwo ihêma cêrekane c’ihêma litagatîfu oyôsire orheganyize kurhenga emurhondêro”. 9 “Obushinganyanya haguma nâwe bubà, buyishi n’emirimo yâwe; ho bwàli amango walemaga igulu; burhahabiri ebirhona omu masù gâwe, n’ebiringânîne n’amarhegeko gâwe”. 10 “Oburhume kurhenga emalunga gâwe matagatîfu, oburhume kurhenga aha ntebe yâwe y’irenge, buyishe bungwâse bunakole haguma nâni, lyo mmanya bici bikusîmîsa”. 11 “Kulya kubà oburhimanya ntâco buhabire, na ntâco cibuyabira kwayumva, bwo bwampabûla omu mirimo yâni yoshi bunandange n’irhegeko lyâbwo”. 12 “Ntyo, emikolo yâni yanakusîmîsa, nanyimangire olubaga lwâwe n’obushinganyanya nnankwânane entebe ya larha”».

13 Muntu obi wankamanya omuhigo gwa Nyakasane? Ndi wakagerêreza ebi Nyakasane alonza? 14 Enkengêro za banyakuhola-wahole kurhindira zikaz’irhindira, n’emihigo yîrhu kuneganega eneganega; 15 bulyâla omubiri gwabole kuzidoha guzidohera iroho, n’ecîra cirâlo c’ibumba kuzidohya cikaz’izidohya omûka guyêsha emirhima. 16 Ehya hanôla igulu rhubimanyira kasanzi. n’ebirhuli hôfi okubihikakwo kurhama; ebiri empingu byôhe ndi wankabisâgarha? 17 N’obulonza bwâwe ndi wankabumanyire nka wêne orhahânaga oburhimanya na nk’orharhumaga omûka gwâwe Mwimâna kurhenga enyanya? 18 Kwo kwarhumire enjira za ab’en’igulu zibà nnungêdu, n’abantu bayigîrizibwa ebi osîma banacira n’oburhimanya bwâwe.