1 Bugwârhîre aha cikwi c’igulu bwahika oku cindi aka ciri-misî; bunarhegesire igulu bwinjà-bwinjà.

2 Narhangiraga okubusîma n’okubulonza erhi nciri murhò, nalonza okurhôlabwo kula barhôla omukazi, nabusîmira iranga lyâbwo. 3 Okubêra bubêra haguma na Nyamuzinda kunayerekane obuluzi bw’enyumpa burhengamwo, Nyakasane Nnâmahanga naye kusîma abusîma. 4 Nêci, bubà bushangire obumanye bwa Nyamuzinda bunashangire n’oku mikolo yâge. 5 Akabà omu kalamo k’omuntu obugale kali kantu kinjà kankacifinjwa, ka hali obugale bulushire oburhimanya obwo bukola ngasi mukolo? 6 N’akabà makengu gakola, ndi wakozire kuli eri igulu kulusha oburhimanya? 7 N’akabà hali osîmire oburhimanya, enkômedu nyinjà go malehe buyâna, kulya kubà bwo buyîgîriza okurhadambiha, obwîrhonzi, obushinganyanya, oburhwâli n’omu kalamo k’abantu, ntà kantu kagwêrhe amakwânane kulusha e­byo. 8 Omuntu akalonza obumanye bunji, oburhimanya burhahabiri ebyagezire, bwanacigereka n’omu byaciyisha; buyishi oku bahalûla ebinwa, buyishi n’emigani, bunamanye ebimanyîso n’ebirhangâzo embere biyishe, burhanahabiri kurhi amango n’ebyanda bikulikirana.

9 Nalalira obwo nti nâbuyanka bubè wîrhu rhwabêra rhwe naye, nabona oku bwanampanûla omu binjà, bunantûlirize omu maganya n’omu malibuko. 10 Naderha obwo nti bwâmpisa oku irenge omu lubaga, nti omu bashosi, nâbà ndi murhò nnambone olukengwa. 11 Nti aha ngombe bâyîsh’insîmira okuyumva duba na bwinjà, n’abakulu bakaz’irhangâla bamambona. 12 Oku ntacibumbûla akanwa erhi banadwîrhe banninga, nkola naderha, barhege okurhwiri, nkalihya emyanzi. bahîre okuboko oku kanwa. 13 Bwâmpisa oku kurhafà, bunarhume nasigira abayisha enyuma zâni akakengêzo k’ensiku n’amango. 14 Nârhegeka amashanja, n’ab’emahanga bâyisha banshige. 15 Abâmi badârhi bâgeramwo omusisi bayuma izîno lyâni, ci omu karhî k’olubaga lwâni nâciyêrekana mwinjà, nnambè ntwâli omu matabâro. 16 Nkola nashubûka ntamûkire aha burhambi bw’oburhimanya, bulyâla, ôli nabwo arhayumva burhè, n’obukômera arhayumva mungo, ci ayôrha ali omu nshagali n’obusîme.

17 Nakaz’igerêreza ntyo niene bushâla-shâla, nayumva omu murhima obwo oku okurhafà mwo kubà omu kulungana n’oburhimanya, 18 oku obusîme bushongwîre, mwo bubà omu kuyinjibana n’oburhimanya, n’obugale burhaheka, mwo bubà omu nfune z’emikolo y’oburhimanya, n’obwenge omu kukômera oburhimanya bubà, n’irenge omu kubuganîza libà; ntaho ntajaga nti ndonze kurhi nankabuhisa aha ka! 19 Nali mwâna muburhe, naburhanwa omurhima nkana. 20 Nali mwinjà, kwo nderhage, nayisha omu mubiri gurhalikwo izâbyo. 21 Ci erhi mmanya oku ntankahika oku burhimanya nka ntabushobwîri emwa Nyamuzinda, -bukengêre obwo, okumanya aha eyo nshôkano erhenga-, nayêrekera emunda Nyakasane ali namushenga, namuganîza n’omurhima gwoshi.