7
Salomoni ali muntu nka abandi
1 Nâni ndi muntu wankafà, ak’abandi boshi, w’oku muntu murhanzi wabumbagwa n’ebidaka. Omu nda ya nyâmà mwo nayankiraga enshusho y’omubiri, 2 myêzi ikumi yoshi, erhi nayisha nâfunûnuka omu mukò gwâge, kurhenga oku mburho y’omushamuka, omu mbongerezi y’îrò. 3 Erhi mburhwa nâni nayîsa emboho abandi bayîsa, narhibukira oku idaho lirhuyankirira rhweshi, izù lyâni lirhanzi, aka erya abandi boshi, lwàli lujamu. 4 Ngozi nâkazâg’igwarhwamwo, nanarhamya abalezi. 5 Ntà mwâmi warhangîre akalamo kundi kundi; 6 kuli boshi, enjira y’okujà omu kalamo eri nguma, n’ey’okukarhengamwo nayo eri nguma.
Okurhonya oburhimanya kwa Salomoni
7 Okwo kwarhuma nâshenga, nanashobôla obukengêre, nasengera bwenêne, nashobôla omurhima gw’oburhimanya. 8 Nayumva ngurhonyize kulusha ishungwè n’entebe, nabona oku obugale buli ntâco aha burhambi bw’oburhimanya. 9 Ntaderhaga nti mbugerere oku mabuye galushîne cicîro, amasholo g’igulu omu masù g’obushinganyanya gunali mushenyi mutyungunu; aha burhambi bwâbo, ensaranga binali bijondo byône. 10 Nayumva mburhonyize kulusha amagala n’obwinjà, naburhonya kulusha omûshi, kulya kubà bwôhe burhahwa burhamoleka. 11 Ci nayishig’ishobôla ehinja byoshi; bwampisakwo obugale burhakaganjwa. 12 Ebyo binjà byoshi nayumva binsîmîsize kulya kubà burhimanya bubidwîrhe; erhi ntanamanyiri oku bwo bubiburha. 13 Nabuyigaga buzira karhinda, nanabumanyîsa buzira kuyongwa, ntanafulike obuhirhi bwâbwo. 14 Oku bantu, buli bugale burhaheka, ababuhikakwo bunabashobôze obwîra bwa Nyamuzinda, n’ebinja by’enyîgîrizo zâbwo binarhume bârhona emunda ali.
Okuhûna oburhabâle bwa Nyamuzinda
15 Nyamubâho âmpe mbuganîre nk’oku alonzize, nantengemwo enkengêro ziringânîne enshôkano zâge, bulyâla yêne ye rhegeka oburhimanya ye nalangula abarhimanya enjira; 16 omu nfune zâge rhubà, rhw’ono n’ebinwa bîrhu, n’obwîrhonzi bwîrhu haguma n’obulenga bwîrhu. 17 Yêne ye wampâga okumanya bwinjà ebiri; ye wàmmanyîsagya kurhi igulu liri liyûbake n’obwôrhere bw’ebiremwa, 18 omurhondêro, obushwinjiro n’aha karhî k’amango, okukulikirana kw’ensiku ndi n’enyofi, n’okukûlana kw’amango, 19 okulondana kw’emyâka n’emirhwe y’enyenyêzi, 20 obwôrhere bw’ebintu n’enkômedu z’eby’erubala, obuhashe bw’abazimu n’enkengêro z’abantu, emilala y’âbâsi n’obuhashe bw’emizî. 21 Ngasi kantu kafulike na ngasi kaboneka nakayîga, bulyâla, mulenga w’ebintu byoshi, ye wanyigîrizagya oburhimanya.
Irenge ly’oburhimanya
22 Bulya nêci bubâmwo
* omûka gw’obukengêre, Mwimâna, gwâgogwâgo, gulimwo kunjikunji, munyinyi-nyinyi, mubidu, mwôji-mwôji, buzira izinga, gwalangala, gurhababala, gurhonya ehinja, lugembe;
23 ntaminikwa, nkola-minjà, nkunda-bantu, ntadundwa, muzibu-kadundu-ntashugulwa, ntabiruba, gugala-byoshi, gunalâba-byoshi, gusheshera omu mirhima yoshi, ey’obukengêre, ecîre n’eminyinyi-nyinyi.
24 Bulyâla oburhimanya bwo bukanya kurhalusa ebikanya byoshi, byoshi buhulukâna erhi kushongôla kwâbwo kurhuma.
25 Obushinganyanya mûka gw’obuhashe bwa Nyamuzinda, nshongôle
† y’obumoleke bw’irenge ly’Ogala-hyoshi, na nt’izinga lyankabuhikakwo.
26 Bubà nshubizo y’obumoleke bw’ensiku n’amango, cirolero buzir’izinga c’ikola lya Nyamuzinda, cerekanè c’obwinjà bwâge.
27 Buli buguma ci buhashire byoshi, buzira kucirhengamwo, bunashashule ngasi kantu. Amango goshi, buyôrha budubukira omu maroho gacîre, mpu lyo bugajira bîra ba Nyamuzinda n’abà abalêbi,
28 bulya obêra bo n’oburhimanya ye Nyamuzinda asîma.
29 Nêci bubà bulushire izûba kuyinjiha, bulushire enyenyêzi zoshi, erhi wankabugerera oku mûshi, wânabona bugulushire.
30 Bulyâla omûshi kuhundusa guhundusa obudufu, oburhimanya bwôhe ntâko buhimwe n’obubî.