11
1 Burhimanya bwarhumaga babêrwa n’emirimo yâbo, omu maboko g’omulêbi
* Mutagatîfu.
2 Bagera omu mpinga, omu nyâma-wandya, bagwîka amahêma aharhabà nyumpa.
3 Bajâna omu irhwe n’abashombanyi, banatundulika ababisha.
4 Erhi bagwârhwa n’enyôrha bakuyâkûza
†, bakûla amîshi omu lwâla, bakûla agâtwa enyôrha omu ibuye lyûmu-lyûmu.
Amîshi, oku go gàhezagya ab’e Mîsiri, gàciza bene Israheli
5 Ntyo, ebyabîre buhane bw’abashombanyi bâbo, byababêra bunguke omu malagîrire gâbo.
6 Oku buhane bw’irhegeko lyâbo ly’okuyîrha orhubonjo, abarhanzi bayôrhana enshôko erhagana y’olwîshi lw’ebirhwange by’omukò n’ebyondo
‡.
7 Bamhali bâwe hôhe wabahêra amîshi manji aharhabà-mîshi;
8 wayêrekana ntyo n’enyôrha yàbagwêrhe buhane buci wali ohanyiremwo abashombanyi bâbo
§.
9 Ago marhangulo, n’obwo kukubûla olukogo lwâwe lwabakubûlaga, gàbayumvîsa malumwa maci olubanja lutubwa n’oburhè luyumvîsa enkola-maligo;
10 bulyâla bôhe, wakazâg’ibarhangula nka muzîre warhonda omwâna, ci abandi kwo wakazâg’ibahana nka mwâmi mudârhi otumuzize omwambali.
11 Babè kulî babè hôfi kuguma bali bababire
*.
12 Omungo kubirhi gwabagwâsire; balaka banalakûla omu kukengêra ebyâbîre:
13 omu kuyumva oku ehyabahanaga hyo hyacizize abandi, bayumva okuboko kwa Nyakasane,
14 n’olya bajiraga bikabulirwa babul’imujira bijandagwa n’okumushekera
†, abazâna erhi babona ebyabîre buzinda, n’erhi bayumva enyôrha ebagwârha oku erhagwârha abashinganyanya.
Abakâg’iharâmya eby’erubala, byabahindamukira
15 Kulya kubà enkengêro za busha busha zàli zibahabwîre, bakaz’iharâmya ensimba zibulula enda oku idaho, n’orhundi rhusimba rhwa busha busha; lêro, oku kubahana, wabarhumira omwandu gw’orhusimba
‡ 16 mpu lyo bayumva oku ehi omuntu akolamo amaligo, hyo anahanwamwo
§.
17 Arhali kuyabirwa kwàli kuyabîrwe okuboko kwâwe kugala byoshi, -kwo walemagamwo igulu n’ebingeru-ngeru-, kurhayabiragwa n’okubarhumira endubu erhi entale ndârhi;
18 nîsi erhi ebiryanyi bikali birhasâg’iboneka, birya byaciremwa binayunjwîre bukali, hirya byashala omûka gw’engulumira, birya byarhengamwo ecûka cabaya, erhi ebya amasù garhengamwo orhukengulo rhw’okuyôbohya,
19 birya byakakolera abantu nabê bibazugulule, erhi bibayirhe ciru n’ebihamba byône.
20 Buzira okwo, omûka gwâwe gwône gwàli gwabahira oku idaho, amagala gabalye erhi maligo gâbo garhuma, erhi omûka gw’obuhashe bwâwe gubashandâze. Cikwône wayumanyanya byoshi, waganja, wagera obuzirho wahiramwo n’olugero.
igwârhiro ly’olwo lugero omu buhane
21 Byâbà ntyo bulyâla obuhashe bwâwe bunji wêne oburhegeka, emisî y’okuboko kwâwe ndiwankayijà omu irhwe? 22 Igulu lyoshi, omu masù gâwe, kwo liri nka mmogomogo ya lutulo oku munzâni, nka kula omurhonyi gw’olumè gurhogera oku idaho sêzi. 23 Bantu boshi obêra bwonjo, bulyâla ohashire byoshi, onabè nk’orhabwîni ebyâha bya abantu, kuderha mpu bacîyunjuze. 24 Nêci ebihaba byoshi kuzigira obizigira, na ntà kantu oshomba omu biremwa byâwe, bulya ocibâga oshombire kantu kalebe, orhânkakalemire. 25 Câba mushâna, kurhi kantu kalebe kankahabîre nk’ôrhâli okalonzize? Kurhi kankabêzireho nk’ôrhâli okahamagireho? 26 Cikwône, byoshi obabalira bulyâla byoshi bibà byâwe, Nyakasane, Mukunda-Buzîne!