1 N’omu ngasi kantu mubà akarhashaja kâwe k’omûka. 2 Hitya hitya ojà wâhana abahirimire, kurhonda ojà wabarhonda n’okukengêza ngasi babîhire, kuderha mpu bayonôke oku mabî, banakuyêmêre, Yâgirwa Nyakasane.

3 Abantu barhanzi bali omu cihugo câwe citagatîfu, wali wamabagaya, 4 bulyâla bakazâg’ikola amaligo g’okushologosa, bali bamaluza amafumu n’enterekêro zirhalizo. 5 Abo bîsi b’abâna*12, 5 Abantu b’e Kanâni bàkazâg’irherekêra abâna bâbo, bababâge nka kula bakanarherekêra e­ngumha y’ecibuzi (Lush 12, 31; 18, 10). , abo ba-nyamulya-malà aha balya enyama z’abantu, abôla bàkazâg’iherherwa omu ndalwè z’orhudali, 6 abo babusi bayîrha ebirhaba birhacirhabâla, wahiga okubaholola n’amaboko ga balarha, 7 mpu eryo ishwa orhonya omu bihugo byoshi, liyûbakwe n’omurhwe nkana gw’abâna ba Nyamuzinda. 8 Abôla nabo wabababalira bulyâla bali bantu, wabarhumira enyisîmbo mpu zibê ba-mushonza-ntambala b’engabo yâwe y’abalwî, mpu babahungumule hitya-hitya. 9 Kurhali kuderha mpu orhankahashir’ihisa enkola-maligo omu nfune z’abashinganyanya, kuli cigamba ciguma c’abalwî, nîsi erhi okubahungumula oku liguma n’akanwa kabî, nîsi erhi omu kubahà ebiryanyi; 10 cikwône omu kubahana hitya hitya, wabahà amango g’okucîyunjuza. N’obwo orhali ohabire oku obûko bwâbo bubà bubî, n’oku obubî bwâbo kaburhano, n’oku ntà mango enkengêro z’emirhima yâbo zankakubûka, 11 bulyâla obûko bwâbo buli buhehêrere kurhenga emurhondêro; burhanali bwôba bwa muntu mulebe bwarhumaga obabalira ebyâha byâbo.

12 Ndi wankakudôsa mpu kurhi okwo wajizire obwo? Ndi wankatwa omu kanwa kâwe? Ndi wankakuyandika mpu wàhungumwîre amashanja walemaga? Ndi wankakujà omu irhwe we mwihôzi w’amabî g’abantu? 13 Nanga, aha nyuma zâwe, ntà wundi Nyakasane ôshîbirira ebintu byoshi mpu wamuyêreka oku omu kutwa emmanja orhalyâlyanya. 14 Ntà mwâmi na ntà murhwâli wankakujîsa kadali, mpu aderhera abà wêne wahâhaga. 15 Kulya kubà oli mushinganyanya, byoshi bushinganyanya obirhegekamwo. Onakaz’ibà obwîne oku okuhana ôrhakwânîni buhane kurhalinganini n’obuhashe bwâwe. 16 Obuzibu bwâwe ye nyamwegemerwa w’obushinganyanya bwâwe, na bulya we nnabyo byoshi co cirhuma obibêra lukogo byoshi. 17 Bo oyêreka emisî yâwe balya barhayêmêra oku we nna-byo-byoshi; n’abayîshi obwo buhashe-bwâwe-kuli-byoshi bakanaburhwâlihirakwo bo otulutumbya. 18 Onakaz’iheba olugero omu buhane bulyâla wêne we ciri-misî, oburhegesi orhurhegekamwo bubâmwo bulembêdu bunji, bulyâla nk’olonzize, obuhashe we nnabwo.

19 Omu kujira ntyo, wayîgîriza olubaga lwâwe, oku omushinganyanya akwânîne abè muntu, n’abâna bâwe, wâbà obalangalize oku ôwamajira okubî, ocimuhîre oku acîyunjuza. 20 Erhi abâga wahanyire abashombanyi ba abâna bâwe n’olukogo lutyo na buzira cikalarhu, n’obwo ciru lufù bali bàkwânîne, erhi abâga wabahîre amango n’amakengu g’okurhenga omu bubî, 21 abâna bâwe bôhe murhima muci wabatwîrîremwo olubanja we walagaga bashakulûza bâbo endagâno nyinjà kulya, onywâna mwe nabo obul’ihirakwo n’endahiro. 22 Kusiga oku odwîrhe warhudunda kwône rhwêhe, ônadwîrhe wahana abashombanyi bîrhu bwenêne kulusha, mpu lyo rhukengêra obwinjà bwâwe nka rhwe rhwatwîra abandi obuhane, na nka rhwe babutwîrîre, rhukengêre olukogo lwâwe.

23 Kwo kwarhumire àbâlimwo isirhe ly’okukola amaligo, wabalirûsa na birya bingerungeru bakazâg’iharâmya. 24 Nêci bali bahisire kulî omu njira y’okuhabuka, balinda baharâmya orhusimba rhurhagwêrhi nda na mugongo mpu banyamuzinda, barhebwa nka bâna barhò. 25 Okwo kwarhuma wabarhumira obuhane bwabayandaza n’enshonyi nka bâna ba birhabà. 26 Abà obuhane bunyi burhumvîsagya, bayumva n’obuhane bwa Nyamuzinda. 27 Omu kubona orhusimba rhwabalibuzagya, rhulya bali bàdesire mpu bo banyamuzinda bâbo, omu kubona rhwo rhukola rhwabahana, bajà bayumva banamanyîrira oku nêci ye Nyamuzinda w’okuli olya barhangag’ihaba†12, 27 Faraoni mwâmi w’e Mîsiri, amango bàhanaga ecihugo ca Mîsiri, ali arhanzir’ihakana mpu arhâlika Bene Israheli (Lub 12, 31-32), erhi âbona abâna b’enfula bàmufîra, lyo àyishir’ijà ayêmêra. Kuyêmêza bamuyêmêzize.. Na ntyo obuhane budârhi bwabarhibukira.