1 Kwo kwarhumire bahâbwa obuhane bubakwânîne, bahanwa n’ebya-bene-ebyo; balibuzibwa n’omwandu gw’orhusimba. 2 Oku wahâna abandi, olubaga lwâwe lwohe walukolera ebinja; amango lwàli lulwâzire amîru, walurheganyiza ebiryo binjinjà mpu lulye: zirya nkwâle. 3 Ab’e Mîsiri nabo bali bagwêrhe n’iralà ly’okulya, cikwône erhi babona enshusho y’okushologosa y’orhusimba*16, 3 Birya bikere by’omu citabu c’Olubungo (7, 27-29; 8, 2). bali babarhumire, iralà bâli ly’okulya lyahirigirha; olubaga lwâwe lwohe, lwâli lurhanzir’ibà lwashalika hisungunu lw’abul’irhôla ebiryo binjinjà. 4 Kwàli kukwânîne abarhanzi, ba-nyakulibuza olubaga lwâwe, bajekwo ishali ly’akîrumè, bambali bâwe nabo, kwàli kukwânîne bayêrekwe ciru kwône oku abashombanyi bâbo bâlibuka.

5 Galya mango ebiryanyi bidârhi bibarhûlakwo omujina, bulya bakaz’ifà n’amanjokà-njokà, oburhè wali obîre burhàli bwa nsiku n’amango. 6 Kwàli kukalihira wabakalihiraga, wanabà nka wabakangaza hisanzi hisungunu, bulya bâli bagwêrhe ecêrekane c’obucire c’okukengêza ebinwa by’irhegeko lyâwe. 7 Na ngasi wayêrekîre eco cêrekane, arhafumiraga okubà acilozirekwo, ci wêne we wanamufumize, Muciza w’abantu. 8 Wayêreka abashombanyi bîrhu ntyo oku wêne we Mulîkûza ôlikûza abantu oku ngasi mabî. 9 Abashombanyi bàkaz’ilumwa n’enzi n’enzige bànakaz’ifà, harhanabonekaga obufumu bwankabaciza, bulya banali bakwânîne okuhanwa n’ebya bene ebyo. 10 Bagala bâwe bôhe ciru n’amanjokà-njoka garhabahashaga, bulyâla olukogo lwâwe lwali luyishir’ibarhabâla lwanabaciza. 11 Ago mîno g’enjoka kukengêza gàkazâg’ibakengêza ebinwa byâwe, -byàli bibande bya kufuma duba†16, 11 Rhulole muli Vulgata. 16, 13: Obuhashe bwa Nyamuzinda burhagwêrhi lubibi. Amango amalonza ntâco arhakalikûzakwo omuntu, anamulikûza oku lufù (rhulole muli Iz 38, 10-17; Lul 9, 14; 107, 18-19); agwêrhe ciru n’okurhenza omuntu omu balindamboho (rhulole muli 1 Bâm 17, 17-23; 2 Bâm 4, 33-35; 13, 21).-, kuderha mpu bankanayibagira bwenêne obone barhacihisiri oku burhabâle bwâwe. 12 Arhanali badundu nîsi erhi mashahi gàbafumize, ci luderho lwâwe, Yâgirwa, lwo lufumya ngasi kantu. 13 Nêci, wêne we rhegeka olufù n’akalamo, we yandagaliza omuntu ekuzimu onashub’imuyinamula. 14 Omu bubî bwâge, omuntu ànayîrha owundi, ci arhankagalula omûka gwamagenda, nîsi erhi alîkûze oyu okuzimu kwamâhisa omu nfune.

15 Kurhankahashikana omuntu afume okuhoko kwâwe. 16 Ba-nyankola-maligo16, 16 Lub 9, 23-24. erhi bali mpu barhakuyishi, lêro wabahana n’obuhashe bw’okuboko kwâwe; enkuba erhasâg’iboneka bundi, enkuba y’olubula, erya ya dubu-dubu, yacîhonda kulibo, n’enkuba-ebanda yabayôca yasirîza. 17 Ecikasômezagya kulusha, omu karhî k’amîshi, n’obwo go gazimya ebindi byoshi, omuliro gwakolêra bwinjà bwinjà‡16, 17 Lub 9, 24-25. Hali amango enkuba ebanda, engulumira ezûke halya yabandaga., bulyâla igulu linakaz’ilwîra abashinganyanya. 18 Hali amango engulumira yakazâg’ibà nka yâhorha mpu yankanayôca ebiryanyi bâli barhumire enkola-maligo; kwàli kuderha mpu babone banayumve oku buhane bwa Nyamuzinda bubashimbire. 19 Haligi n’amango engulumira yakazâg’iyâka bwenêne omu karhî k’amîshi, kuderha mpu esirîze emyâka y’omu ishwa ly’enkola-maligo. 20 Olubaga lwâwe lwôhe waluyikuza n’ebiryo bya bamalahika, buzira kurhama. walurhumira ebiryo birheganye kurhenga enyanya, biryo byankashagalusa ngasi muntu, na ntâye birhankasîmîsa§16, 20 Mâna ago (rhulole muli Lub 16, 31; Lul 78, 25).. 21 N’ehyo biryo wakazâg’ihâna, byakaz’iyêrekana obwinjà bwâwe oku bâna bâwe; byakaz’isîmisa ngasi obirîre byanakaz’ihinduka kulya owabirya alonzize. 22 Olubula n’olumè byakaz’irinda omuliro buzira kujonga, kuderha mpu abantu bamanye oku omuliro gwakaz’iyâka buzira kuhorha omu lubula n’omu nkuba, mpu gusingônole emyâka y’abashombanyi, 23 banamanye oku gwakazâg’iyibagira obwôrhere bwâgwo lyo gurhag’isherêza ebiryo bya abashinganyanya. 24 Byàbâga ntyo bulya ebiremwa bibà bikushizire we mulemi wabyo; kal’ibala bikola nka birhumirwe mpu bihane endyâlya, kurhûza birhuza nka birhumirwe oku makwânane g’abakulangâlira. 25 Ntyôla, ebiremwa byakaz’icijira barhumisi b’obuhanyi bwâwe bulîsa ngasi kantu, kwo kwarhumire bikaz’ihinduka nk’oku ôbilagîrîrekwo alonzize; 26 ntyo, Yâgirwa Nyakasane, abâna bazigirwa bamanya oku arhali emilala y’emburho y’omu ishwa yo eyikuza omuntu, ci akanwa kâwe ko kabika abakuyêmêra. 27 Bulyâla ebi omuliro gurhahashag’isherêza, byakaz’ijonga biyumva idûrhu ly’omwonzi munyi gw’izûba, 28 kuderha mpu oyîgîrize boshi oku kukwânîne bashokolere izûba bakola bavuga omunkwa, banakaz’ishenga embere izûba libashe. 29 Bulyâla obulangâlire bw’omugambanyi kwo bujonga nka lubula lwa mpondo. Kwo budwa nka mîshi masigala.