1 Wêhe Nyamuzinda Wîrhu, ôbà mwinjà, orhabêsha orhanakunira duba, byoshi lukogo obirhegekamwo. 2 Ciru rhwankajira ebyâha erhi rhunali bâwe, bulya rhurhahabiri obuhashe bwâwe; cikwône rhurhâbijirè bulya rhuli bâwe. 3 Bulyâla okukumanya bwo bushinganyanya bwimâna, okumanya obuhashe bwâwe lyo igwârhiro ly’okurhafà 4 Nanga Yâgirwa, okusinga abantu basingaga obulenga bubî, kurharhuhabulaga, n’omukolo gwa bushabusha gw’ababinji gurharhurhebaga, rhurharhebagwa ciru n’ensanamu z’amarangi-marangi garhanalingânîni. 5 Omuhwinja yêhe akaz’ilolakwo anayumve amîru, anayumve amâcîfinja enshusho y’ensanamu zirhalimwo mûka. 6 Nkunda-maligo abacîkubagira ebiri ntyo, ababikola, abacîfinja byo n’ababiharâmya.

7 Lâba oku omubumbi amâhinaga ibumba lyâge; amâbumbamwo ebirugu rhunakolêsa. Eryôla ibumba lyonênè, lyo lyarhenziremwo ebikamirwa n’ebikabulirwa. Muli ebyo birugu, cihi cakolêsibwa kulebe erhi kulebe, omubumbi yêne wâlutwa*15, 7 Ebinwa bishokwîre, byàli bya kushekera ebibinjwa n’abantu bigashânizibwe mpu banyamuzinda. Ebinwa bikulikire aha, bishekîre ababinja n’abatula ebya bene ebyo. Burhanzi: irumbi mpu bushanja; kabirhi: irumbi mpu balenga.. 8 Na kandi, -cikwône kucirhamiza busha-, ebyo byondo byônene abumbamwo irumbi mpu nyamuzinda, byo yêne acizind’irhengamwo lishinjo, byo anashubiramwo, -ye muntu wabirhengagamwo-, hano bakola bamusambîsa oku buzîne bwâge. 9 Ali aho, arhashibiriri olufù lwâge, arhanamanyiri oku ensiku zâge ziri nyofi; cikwône yêhe oku batuzi b’amasholo n’amarhale acîgerera, ayige abatuzi b’ecûma, alongeze n’irenge omu kubumba ebirhali byo. 10 Omurhima gwâge luvù, n’ebi ahirakwo omurhima byo bidaka kulusha ebidaka, n’obuzîne bwâge bwo bugalugalu oku ibumba. 11 Kulya kubà arhishi omubumbi wamubumbaga olya wamuhiragamwo omurhima gukola emikolo, anamubûhiramwo omûka gw’obuzîne. 12 Kàli ciru obuzîne bwîrhu kwo abulola nka mashârha ga bâna, n’okubâho kwîrhu kwo akulola nka cambu bashimbamwo obunguke; gwârhi yêne, mpu «ntaho omuntu arhayungukira, ciru n’omu bubî». 13 Kulusha abandi, oyôla arhahabiri oku câha abà ajizire, ye muntu oyanka idaho abumbamwo ebirugu bibereka, abulikûlamwo n’ensanamu za banyamuzinda!

14 Abasirhe bali banji, cikwône abâli basirhe kulusha, n’abâli bazamba kulusha omurhima gw’ecirhaba, banali abashombanyi b’olubaga lwâwe, balya balulibuzagya†15, 14 Kukola kushubira omu myanzi y’olubaga lwa Nyamuzinda n’Ab’e Mîsiri amango g’olubungo. Omwandisi anali arhanzir’iyireka, ayanka akanwa k’embalâlîzi kayêrekîre banyamuzinda b’obwîhambi (13, 1—15, 13).. 15 Bôhe mpu banyamuzinda b’amashanja boshi banali banyamuzinda, n’obwo barhankahash’icîbonera n’agâbo masù, nîsi erhi bakolêse amazulu gâbo mpu bayîsemwo omûka, erhi marhwiri gâbo mpu bayumvemo, erhi eminwe y’enfune zâbo mpu bagwarhemwo hirebe, nîsi erhi amagulu gâbo mpu balambagiremwo. 16 Bulyâla muntu wabajiraga, muntu oyîsa omûka muhôzanyo wababumbaga. Cikwône ntà muntu wankahash’ibumba enshushano emushushire. 17 Nyakuhola-wahole, enkola-maligo zâge mpu nfune, zirhakola ogurhali mufiriri. Yêne ye mukulu hali ebyôla agashâniza, bulya yêhe abwîne cahiramwo omûka, ci byôhe ntà mango! 18 Banagashânize ciru na rhunyamakobwa rhw’ensimba bulya rhwo rhulushire ebindi bingolongolo. 19 Orho rhusimba rhurhalimwo bwinjà buci bwankarhuma rhwayâgalana kula omuntu ankayâgalwa n’ecintu: rhwôhe kurhala rhwarhazire oku irenge n’omugisho gwa Nyamuzinda.